(නිමල කොඩිතුවක්කු)

එක්සත් ජාතික පක්ෂයේ පළමු මැතිවරණ රැස්විම ඩිජිටල් තාක්ෂණය ඔස්සේ පිටකෝට්ටේ සිරිකොත පක්ෂ මූලස්ථානයේ දී පක්ෂ නායක රනිල් වික්‍රමසිංහ මහතාගේ ප්‍රධානත්වයෙන් අනිද්දා (28)  පස්වරු 4.00 ට ආරම්භ කිරීමට නියමිතය.

සිරිකොත එක්සත් ජාතික පක්ෂ මූලස්ථානයේ දී පවත්වෙන එම රැස්විමට සමගාමීව සෑම මැතිවරණ කොට්ඨාසයකදීම  අපේක්ෂකයන් විසින්  තවත් මැතිවරණ රැළි 160ක් පවත්වන බවද මාතර දිස්ත්‍රික් හිටපු පාර්ලිමේන්තු මන්ත්‍රී සාගල රත්නායක මහතා පැවසීය.

එම සෑම රැළියක්ම මැතිවරණ කොමිසමේ  උපදෙස් මත  උපරිමය සිය දෙනෙකුගේ සහභාගීත්වයෙන් පවත්වන බවද සිරිකොත එක්සත් ජාතික පක්ෂ මූලස්ථානයේ අද (26) පැවති මාධ්‍ය හමුවකට එක්වෙමින්  ඔහු පැවසීය.

ඒ අනුව මැතිවරණ රැළි  160කින් 16000ක්  අවම වශයෙන් මේ සඳහා සහභාගී වීමට නියමිත බවත්  මෙයට අමතරව නිවෙස්වල  සිට මෙම රැස්වීම්වලට  සහභාගී විය හැකි බවත් රත්නායක මහතා කීවේය.

එක්සත් ජාතික  පක්ෂ නිල ෆේස්බුක් අඩවිය, යූ ටියුබ් ඇතුළු නව මාධ්‍ය  මගින් මේ හා සම්බන්ධ වීමට පහසුකම් සලසා දී ඇති බවද  ඔහු පැවසීය.

අනෙකුත් පක්ෂයන්ට ආදර්ශයක් වෙමින් ඩිජිටල් තාක්ෂණය යොදාගනිමින් ජනතාව ආරක්ෂා වන ලෙස මැතිවරණ ව්‍යාපාරය මෙහෙයවීම මෙහි අරමුණ බවද සාගල රත්නායක මහතා වැඩිදුරටත් සඳහන් කළේය.