(එෆ්.අස්ලම්)
 
ඌව පළාත් අධ්‍යාපන අමාත්‍යංශයට නොදන්වමින් නීතිවිරෝධි අන්දමින් ඉරානයේ ඉස්ලාම් විශ්වවිද්‍යාලයක් මගින් සිදුකරන උපාධි පාඨමාලා සඳහා පාසල් ලබාදුන් ඌව පළාතේ ප්‍රධාන පෙළේ දෙමළ විද්‍යාල හතරක විදුහල්පතිවරුන් සිව් දෙනෙකුට එරෙහිව පළාත් දෙමළ අධ්‍යාපන අමාත්‍යංශය මගින් විමර්ශනයක් ආරම්භ කර තිබේ.
 
බදුල්ල සරස්වතී ජාතික පාසල, පස්සර දෙමළ මහා විදුහල යන මධ්‍යම රජයේ ජාතික පාසල් සහ හපුතලේ සහ බණ්ඩාරවෙල දෙමළ විදුහල්වල විදුහල්පතිවරුන්ට එරෙහිව ඌව පළාත් දෙමළ අධ්‍යාපන අමාත්‍ය සෙන්දිල් තොන්ඩමන් මහතාගේ නියෝග මත මෙම විමර්ශනය සිදුකරන බව අමාත්‍යංශ ආරංචි මාර්ග සඳහන් කරයි.
 
ඉරානයේ අල් මුස්තෆා නැමති මූලධර්මවාදී ඉස්ලාම් සරසවියක් විසින් වතුකරයේ මෙම උපාධි පාඨමාලාව ඉකුත් වසරේ මැයි මස 21 වනදින ආරම්භ කර තිබෙන බවත් මේ සදහා එක්සත් ජාතික පක්ෂ බදුල්ල දිස්ත්‍රික් පාර්ලිමේන්තු මන්ත්‍රී ඒ.අරවින්ද කුමාර් මූලික වී ඇති බවත් මන්ත්‍රීවරයාගේ අවශ්‍යතාව පරිදි මෙකී පාඨමාලාව සිදුකර ඇත්තේ බදුල්ල දිස්ත්‍රික්කයේ ප්‍රධාන ඉස්ලාම් මව්ලවිවරයාගේ විරෝධය මැද බවත් මේ වන විට සිදුකර ඇති විමර්ශනවලින් හෙළිවී තිබේ.
 
එමෙන්ම මෙම පාඨමාලාව සිදුකිරීම සඳහා ඉරානයේ දේශකවරුන් ද මෙරටට ගෙන්වා දී තිබෙන බවත් මෙම පාඨමාලාව මෙරට සාම්ප්‍රදායික  මුස්ලිම් ජනතාවට නොගැලපෙන ඔවුන්ගේ මතවාදයන් හා විශ්වාසයන්ට පටහැනි බවට ඉස්ලාම් ආගමික ප්‍රධානීන්ද විරෝධතා ඇති බවද අනාවරණය වී තිබේ.
 
මීට අමතරව බුද්ධි අංශ විසින් සිදුකරන ලද විමර්ශනවලට අනුව මෙම විදුහල්පතිවරුන් සිව්දෙනා පෞද්ගලික නිවාඩු ගනිමින් ඉරාන විශ්ව විද්‍යාලයේ වියදමින් පසුගිය මස 10 වනදා  එරට සංචාරයක ද නිරත වී සිට ඇතැයිද වාර්තා වේ.
 
මෙම පාඨමාලාව වතුකරයේ තරුණ තරුණියන් 600ක් පමණ හදාරන බවත් ඒ අතරින් 500කට අධික පරිසක් වතුකරයේ දෙමළ හා කතෝලිකයින් බවත් මෙය අන්තවාදී මූලධර්මවාදී මතවාදයන්ට අනුකූලව අල්කුරාණය වෙනස් අයුරින් උගන්වන බවත් ඉරාන දේශපාලනය ද ඊට ඇතුළත් කර ඇති බවත් ඌව පළාත් දෙමළ අධ්‍යාපන අමාත්‍ය සෙන්දිල් තොන්ඩමන් මහතා කළ විමසුමකදී සදහන් කර සිටියේය.