(පද්මා කුමාරී කංකානම්ගේ )

තවමත් මිල තක්සේරු නොකළ,"අම්බර "නම් වටිනා සත්තව කොටස් කිලෝ 11 ක්,කල්පිටිය කන්දකුළිය වෙරළේ ධීවරයකුගේ බෝට්ටුවේ තිබියදී, ධීවරයා ද සමගින් අත්අඩංගුවට ගත් බව කල්පිටිය පොලිසිය පවසයි.

මුහුදු ක්ෂීරපායී සතෙකු වන තල්මසාගේ සත්ත්ව කොටසක් වන මෙම අම්බර තමා සන්තකයේ තබා ගැනීම,වනජීවී හා වෘක්ෂලතා ආඥා පනත යටතේ වරදක් බව අත්අඩංගුවට ගත් කල්පිටිය පොලිසිය පවසයි.

අප මේ පිළිබදව කල්පිටිය වනජීවී දෙපාර්තුමේන්තුවේ ජ්‍යෙෂ්ඨ අඩවි ආරක්ෂක නිළධාරී මංජුල කුමාර මොරතැන්න මහතාගෙන් විමසූවෙමු.

"අම්බර නිෂ්පාදනය වන්නේ තල්මසාගේ ආහාර ජීර්ණ පද්ධතිය ඇතුළේ.දීර්ඝ කාලයක් තිස්සේ සිදුවන රසායනික ප්‍රතික්‍රියා රාශියක ප්‍රතිඵලයක් වශයෙන් තමයි මෙම අම්බර නිෂ්පාදනය වන්නේ.පසුව තල්මසාගේ වමනය වශයෙන් හෝ මළ පහ සමගින් මේවා සාගරයට එකතුවෙනවා."

"ඉතා දුර්ලහ නිසා මේවා වටිනවා.සුවද විලවුන් නිෂ්පාදනය සදහා යොදා ගන්නා බවත් පැවසෙනවා."

සැකකරු සහ අම්බර පුත්තලම මහේස්ත්‍රාත් අධිකරණයට ඉදිරිපත් කිරීමට නියමිත ය.