(ඩයනා උදයංගනී)

මන්නාරම සිට හලාවත, කොළඹ, ගාල්ල සහ හම්බන්තොට හරහා පොතුවිල් දක්වා වන මුහුදු ප්‍රදේශයන්හි අනිද්දා (30) දහවල් 12.00 දක්වා ධීවර කටයුතුවල නිරතවීමෙන් වළකින්නැයි කාලගුණ විද්‍යා දෙපාර්තමේන්තුව දැනුම්දීමක් කරයි.

එම මුහුදු ප්‍රදේශයන් හි පැයට කිලෝමීටර 60, 70 පමණ දක්වා වේගවත් තද සුළං ඇතිවිය හැකි නිසා විටින් විට ඉතා රළු විය හැකි බවත්, නාවුක ප්‍රජාව ද මේ සම්බන්ධව අවධානයෙන් කටයුතු කළ යුතු බවත් එම දෙපාර්තමේන්තුව සඳහන් කරයි.

දිවයිනේ බොහෝ ප්‍රදේශවලට හෙට (29) දිනයේදී තද වැසි ඇතිවන අතර ඇතැම් ප්‍රදේශයන්ට මිලිමීටර 150 ඉක්මවූ ඉතා තද වැසි ඇතිවිය හැකි බව ද කාලගුණ විද්‍යා දෙපාර්තමේන්තුව පවසයි.

ඒ අනුව බස්නාහිර, සබරගමුව සහ මධ්‍යම පළාත්වලත්, ගාල්ල සහ මාතර දිස්ත්‍රික්කවලත් ඇතැම් ස්ථානයන්හි මිලිමීටර 150 ඉක්ම වූ ඉතා තද වැසි ඇතිවන අතර උතුරු, උතුරුමැද සහ වයඹ පළාත්වලත් ත්‍රිකුණාමලය දිස්ත්‍රික්කයේත් ඇතැම් ස්ථානවල මිලිමීටර 100 ඉක්මවූ තද වැසි ඇතිවිය හැකි බව කාලගුණ විද්‍යා දෙපාර්තමේන්තුවේ ප්‍රකාශකයෙක් පැවසීය.

සෙසු ප්‍රදේශවල ද සවස් කාලයේදී හෝ රාත්‍රී කාලයේදී තැනිත් තැන ගිගුරුම් සහිත වැසි ඇතිවිය හැකි බව එම ප්‍රකාශකයා සඳහන් කළේය.

දකුණු පළාතේත්, පොළොන්නරුව සහ මාතලේ දිස්ත්‍රික්කවලත්, මධ්‍යම කඳුකරයේ බටහිර බෑවුම් ප්‍රදේශවලත් විටින් විට පැයට කිලෝමීටර 60, 70 පමණ වේගවත් තරමක තද සුළං ඇතිවිය හැකි බව ද ඔහු පැවසීය.

බේරුවල සිට ගාල්ල හරහා හම්බන්තොට දක්වා වෙරළාසන්න මුහුදු ප්‍රදේශවල මුහුදු රළ ඉහළයාම හා ගොඩබිමට පැමිණීම සිදුවිය හැකි බැවින් වෙරළාසන්න ප්‍රදේශවල ජනතාව විමසිලිමත් විය යුතු බව ද කාලගුණ විද්‍යා දෙපාර්තමේන්තුව පවසයි.

ගිගුරුම් සහිත වැසි ඇතිවන විට අකුණු අනතුරු ද ඇතිවිය හැකි බැවින් අනතුරු අවම කරගැනීමට ක්‍රියාකරන්නැයි කාලගුණ විද්‍යා දෙපාර්තමේන්තුව ජනතාවට දැනුම් දීමක් ද කරයි.