(සිතුම් චතුරංග)
 
යාපනය, පලෙයි මුහමාලෙයි ප්‍රදේශයේ තිබී ටී.එන්.ටී නැමති අධි බලැති පුපුරණ ද්‍රව්‍ය කිලෝ හතරයි ග්‍රෑම් 500 ක් රැගෙනයාමට තැත් කළ පුද්ගලයින් දෙදෙනකු අද(22) යාපනය අරියාලෙයිහීදි අත්අඩංගුවටගත් බව පලෙයි පොලිසිය කියයි.
 
සැකකටයුතු පුද්ගලයින් දෙදෙනකු පිළිබඳ පලෙයි පොලිස් නිලධාරීන් හා යුද හමුදාව වෙත ලැබුණ තොරතුරක් මත කළ සොයාබැලීමකදී අදාළ පුපුරණ ද්‍රව්‍ය සොයාගෙන ඇති අතර නිලධාරීන් පැමිණෙන අවස්ථාවේ ඒවා රැගෙන ආ පුද්ගලයින් දෙදෙනා එම ස්ථානයෙන් පලාගොස් සිටි බව පොලිසිය පැවසීය.
 
පුපුරණ ද්‍රව්‍ය රැගෙන ආ පුද්ගලයින් යතුරු පැදියකින් පලාගොස් ඇති බවට ලැබුණ තොරතුරු මත පොලිසිය හා යුද හමුදාව එක්ව කළ මෙහෙයුමකදී සැකකරුවන් අත්අඩංගුවට ගත් බව පොලිසිය පැවසීය.
 
පොලිසිය පැවසූවේ සැකකරුවන් මුහමාලෙයි ප්‍රදේශයේ බිම් බෝම්බ නිශ්ක්‍රීය කරන කණ්ඩායමක සමාජිකයින් වන අතර මෙම පුපුරණ ද්‍රව්‍ය  මුහමාලෙයි ප්‍රදේශයේ බිම්බෝම්බ ඉවත් කිරීමේදී සොයාගත් පුපුරණ ද්‍රව්‍ය බවය.
 
සැකකරුවන් කුමන අරමුණක් සඳහා මෙම පුපුරණ ද්‍රව්‍ය රැගෙනයාමට උත්සහ කළේද යන්න මෙතෙක් අනාවරණය නොවූ බවද පොලිසිය පැවසීය.
 
අත්අඩංගුවටගත් සැකකරු මීසාලේ, එළුදුමට්ටුවාල් හා අරියාලෙයි පදිංචි ප්‍රදේශයේ පදිංචි පුද්ගලයින්ය.
 
සිද්ධිය සම්බන්ධයෙන් පලෙයි පොලිසිය වැඩිදුර විමර්ශන සිදුකරයි.