(බිමල් ශ්‍යාමන් ජයසිංහ)

අගලවත්ත ද්විත්ව මනුෂ්‍ය ඝාතනයට සම්බන්ධ සැකකරුවන් දෙදෙනෙක් අද (22) සැකපිට තැන්නහේන ප‍්‍රදේශයේ අතුරු මාර්ගයකදී අත්අඩංගුවට ගත් බව අගලවත්ත පොලිසිය කියයි.

මෙසේ අත්අඩංගුවට පත්වූයේ අගලවත්ත තැන්නහේන අටහවුල්හේන ප‍්‍රදේශයේ පදිංචි 42 සහ 45 වියේ පසුවන සැකකරුවන් දෙදෙනෙකි.

සැකකරුවන් දෙදෙනා තැන්නහේන ප‍්‍රදේශයේ අතුරු මාර්ගයකදී අත්අඩංගුවට ගෙන ඝාතනය කිරීමට යොදාගත් ලේ තැවරී ඇති කැත්ත එක් සැකකරුවෙක්ගේ නිවසේ මදටිය ගසක් යට සඟවා තිබියදී සොයාගත් බව පොලිස් නිලධාරියෙක් පැවසීය.

ඝාතනයට ලක්වූ යුවල සමගින් ඔවුන්ගේ නිවසේ රූපවාහිනිය නරඹමින් සැකකරුවන් දෙදෙනාද මත්පැන් පානය කර ඇතැයිද එහිදී ඇති වූ කතාබහක් දුරදිග යාම ආරවුලට මුල්වී ඇතැයිද පොලිසිය කියයි.

ආරවුල ඇතිවීමෙන් පසු නිවසේ තිබූ කරුදු කපන කැත්තෙන් අඹු සැමි යුවලට පහරදී ඇති බවට දැනට සිදුකර ඇති පරීක්‍ෂණවලදි හෙළිවී ඇතැයි පොලිසිය කීය.

එක් සැකකරුවෙකුට 2012 වර්ෂයේ මනුෂ්‍ය ඝාතන චෝදනාවක් පවතින බවද පොලිස් නිලධාරියෙක් පැවසීය.

තැන්නහේන තිරුවානකැටිය පලේකටිටුව වතු නිවාස වල පදිංචිව සිටි 48 හැවිරිදි තිලකසිරි සහ 52  හැවිරිදි ටෙක්ලා චන්ද්‍රානි නමැති අඹුසැමි යුවල 19 වැනිදා රාත‍්‍රී තියුණු ආයුධයකින් කපාකොටා ඝාතනය කිරීම සම්බන්ධයෙන් සිදුකරන පරීක්‍ෂණවලට අදාලව සැකකරුවන් අත්අඩංගුවට ගත් බව පොලිසිය කියයි.