(චන්ද්‍රසේන ගමගේ)

අගුණකොළපැලැස්ස  බන්ධනාගාරයෙන්  පොලිස් විශේෂ කාර්ය බලකා  නිලධාරීන් ඉවත් කරන ලෙස ඉල්ලා සිරකරුවන් ඇරැඹු  විරෝධතාව මෙහෙයවූ සිරකරුවන් 08 දෙනෙකු අද (24) අගුණකොළපැලැස්ස බන්ධනාගාරයෙන් ඉවත්කර වෙනත් බන්ධනාගර වෙත මාරුකර යවා ඇත.

මෙම විරෝධතාවයෙන් අනතුරුව කළ  පරීක්ෂණයකදී එම සිරකරුවන් 08 දෙනා  තමන් කළ වරද පිළිගෙන  තමන්ව වෙනත් බන්ධනාගාරයක් වෙත මාරු කරන ලෙස කරන ලද ඉල්ලීමකට අනුව අගුණකොළපැලැස්ස බන්ධනාගාරයේ පාලන අධිකාරිය විසින්  ඔවුන් 8 දෙනා වෙනත් බන්ධනාගාර වෙත මාරු කර තිබේ .

මාරු කරනලද සිරකරුවන් අතර ජුලම්පිටියේ අමරේ, අබේනායක, තංගල්ලේ මහේෂ්  ඇතුළු පිරිසක් සිටින අතර මොවුන් කළුතර, කුරුවිට, ගාල්ල, මාතර, මොනරාගල යන බන්ධනාගාර වෙත මාරු කර තිබේ .

එමෙන්ම මෙසේ මාරු කරන ලද සියලු සැකකරුවන් හෙරොයින් හා මනුෂ්‍ය ඝාතන සම්බන්ධයෙන් වරදකරුවන්ව සිටින අය බව බන්ධනාගාර නිලධාරියෙක් පැවසීය.

අගුණකොළපැලැස්ස බන්ධනාගාරයෙන් පොලිස් විශේෂ කාර්ය බලකා නිලධාරින් ඉවත් කරන ලෙස සිරකරුවන් කරන ලද ඉල්ලීමට බන්ධනාගාර අධිකාරීවරයා එකඟ නොවීම නිසා බන්ධනාගාර අධිකාරීවරයා ඉවත් කරන ලෙසට විරෝධතාවයේදී පැවසූ බව  විරෝධතාවය පිළිබඳව සිදු කරනු ලැබූ පරීක්ෂණයේදී අනාවරණය වූ බව වාර්තා වෙයි.

හිටපු බන්ධනාගාර අධිකාරී ඩබ්ලිව්. පී. ධම්මික මහතා නැවත අගුණකොළපැලැස්ස බන්ධනාගාරයේ අධිකාරීවරයා වශයෙන් පත්කර ඇති බව බන්ධනාගාර ආරංචි මාර්ග සඳහන් කරයි.