බංගලාදේශයේ කඳවුරක රෝහින්ග්‍යා සරණාගතයෙකු කොරෝනා රෝගයෙන් මියගොස් තිබේ.

ඔහු බංගලාදේශ කඳවුරක දී කොරෝනා රෝගයෙන් මියගිය ප්‍රථම පුද්ගලයා බව එරට බලධාරීහු පවසති.

වයස අවුරුදු 71ක් වන මෙම පුද්ගලයා කෙක්ස්බසාර් දිස්ත්‍රික්කයේ නගරයෙන් පිටත පිහිටි කඳවුරේ වෛද්‍ය මධ්‍යස්ථානයේ ප්‍රථිකාර ලබමින් සිටියදී මියගොස් ඇත.

මෙම කඳවුරේ පළමු රෝගියා වාර්තා වූයේ මැයි 14 වනදා ය. එයින් පසු කඳවුරේ 29 දෙනකුට පමණ රෝගය ආසාදනය විය.

මියන්මාරයේ කුරිරු මිලිටරි මර්දනයෙන් පලා ආ රෝහින්ග්‍යා සරණාගතයන් මිලියනයකට අධික සංඛ්‍යාවක් කොක්ස්බසාර් කඳවුරේ වෙසෙති.

කඳවුරේ සෑම වර්ග කිලෝමීටරයකටම මිනිසුන් 60,000 - 90,000ත් අතර සංඛ්‍යාවක් වෙසෙති.

කඳවුරේ වසංගතය ව්‍යාප්ත වුවහොත් මානුෂීය ව්‍යසනයක් සිදුවිය හැකි බවට සහන සේවා කණ්ඩායම් අනතුරු අඟවා තිබේ.

රිලීෆ් ඉන්ටර්නැෂනල් හි කොක්ස් බසාර් වැඩසටහන් අධ්‍යක්ෂ ඇන්ජෙලෝ ඇගස්ටින් පැවසූයේ එය ටයිම් බෝම්බයක් තරම් දරුණු බවයි.

(රොයිටර් පුවත් ඇසුරිණි - 085)