(නිමන්ති රණසිංහ)

පොල්ගහවෙල මහ රෝහලේ කොරෝනා රෝගියෙකු සිටින බවට සදහන් කරමින් මුහුණු පොත ඔස්සේ අසත්‍යයක් ප‍්‍රචාරය කළැයි අපරාධ පරික්ෂණ දෙපාර්තමේන්තුව අත්අඩංගුවට ගත් පුද්ගලයකු රුපියල් ලක්ෂයක ශරීර ඇපයක් මත මුදා හරින ලෙස කොළඹ අතිරේක මහේස්ත‍්‍රාත් එස්. ප‍්‍රභාකරන් මහතා අද (08) නියෝග කළේය.

මෙලෙස ඇප මත මුදා හරිනු ලැබුවේ පොල්ගහවෙල සණස බැංකුවේ සේවය නියුතු ව සිටි සුමේධ ශි‍්‍රයාකාන්ත නැමැත්තාය.

පරිගණක අපරාධ පනතේ හයවැනි වගන්තිය ප‍්‍රකාරව සහ ලංකා දණ්ඩ නිති සංග‍්‍රහය ප‍්‍රකාරව වරදක් කර ඇතැයි අපරාධ පරික්ෂණ දෙපාර්තමේන්තුව මෙම සැකකරු අත්අඩංගුවට ගෙන තිබුණේ අද (08) පෙරවරුවේදීය.

පොල්ගහවෙල රෝහලේ කොරෝනා වයිරසයෙන් ආසාදිත රෝගියෙකු ප‍්‍රතිකාර ලබන බවට සදහන් කරමින් මෙම සැකකරු සිය මුහුණු පොතේ පෝස්ටුවක් නිර්මාණය කර අසත්‍ය ප‍්‍රවෘත්තියක් අන්තර්ජාලය වෙත මුදා හැර ඇති බවත්, ඒ සම්බන්ධයෙන් පොල්ගහවෙළ පොලීසියේ ස්ථානාධිපතිවරයා කළ පැමිණීල්ලකට අනුව සැකකරු අත්අඩංගුවට ගත් බවත් අපරාධ පරික්ෂන දෙපාර්තමේන්ත-ුව අධිකරණයට කරුණු ඉදිරිපත් කර තිබිණී.

සැකකරු වෙනුවෙන් අධිකරණයේ පෙනී සිටි නිතීඥ සුදර්ශන වික‍්‍රමරත්න මහතා සදහන් කළේ තම සේවාදායකයාට එම තොරතුර රෝහලේ වෛද්‍යවරයකු සහ හෙදියක විසින් ලබාදුන් එකක් බවත් එය සමාජයේ දැනගැනීම සදහා සද්භාවයෙන් මුහුණුපොතට මුදා හැරි බවත්ය.


පසුව එය අසත්‍ය ප‍්‍රවෘත්තියක් බව දැනගත් පසු ඔහු එය සිය මුහුණු පොතෙන් ගලවා ඉවත් කර ගත් බවත් නිතීඥවරයා අධිකරණයට කරුණු ඉදිරිපත් කළේය.

ඉදිරිපත් වූ කරුණු සැලකිල්ලට ගත් අධිකරණය, මෙවන් වැරදි නැවත කිසිවිටකත් නොකරන ලෙසට සැකකරුට තරයේ අවවාද කර රුපියල් ලක්ෂයක ශරීර ඇපයක් මත මුදා හැරීය.