කොරෝනා වයිරසය ආසාදනය වී රෝහල් ගත කළ බ්‍රිතාන්‍ය අග්‍රාමාත්‍ය බොරිස් ජොන්සන් ඊයේ (6) රාත්‍රියම දැඩි සත්කාර ඒකකයේ ගත කළ බව රෝහල් බලධාරීහු අද (7) ප්‍රකාශ කළහ.

දින 10කට පසුත් නව කොරෝනා වයිරසයේ රෝග ලක්ෂණ පෙන්වීමත් දැඩි කැස්ස හා උණ ගතිය නිසා ඉරිදා පස්වරුවේ බ්‍රිතාන්‍ය අග්‍රාමාත්‍යවරයා රෝහල් ගත කළේය. වෛද්‍ය පරීක්ෂණ සඳහා ඉරිදා පස්වරුවේ රෝහල් ගත කළ බ්‍රිතාන්‍ය අග්‍රාමාත්‍යවරයා සඳුඳා පස්වරුවේ දැඩි සත්කාර ඒකකයට ඇතුළත් කළේය.

බ්‍රිතාන්‍ය අග්‍රාමාත්‍ය බොරිස් ජොන්සන් 55 වන වියේ පසු වේ. කොරෝනා වයිරසය ආසාදනය වූ ලොව ඉහළ හා ප්‍රමුඛ පෙළේ ලෝක නායකයා වන්නේ ද ඔහු ය. රට තුළ ජාතික හදිසි තත්ත්වයක් ඇතිව තිබියදී අග්‍රාමාත්‍යවරයකු දැඩි සත්කාර ඒකකයට ඇතුළත් කළ පළමු අවස්ථාව මෙය යැයි ද විදෙස් මාධ්‍ය වාර්තා කර තිබිණි.

ඇමෙරිකා එක්සත් ජනපද ජනාධිපති ඩොනල්ඩ් ට්‍රම්ප්, රුසියානු ජනාධිපති ව්ලැදිමීර් පුටින්, ප්‍රංශ ජනාධිපති එමානුවෙල් මැක්‍රෝන් , ඔස්ට්‍රේලියානු අගමැති ස්කොට් මොරිසන් ඇතුළු ලෝක නායකයා ඇතුළු විශාල පිරිසක් බ්‍රිතාන්‍ය අග්‍රාමාත්‍යවරයාට ඉක්මන් සුව ප්‍රාර්ථනා කළහ. බ්‍රිතාන්‍ය අග්‍රාමාත්‍යවරයාට කොරෝනා වයිරසය ආසාදනය වී ඇති බව අනාවරණය වූයේ මාර්තු මස 27 වැනිදාය.

බ්‍රිතාන්‍ය අග්‍රාමාත්‍යවරයා ස්වසන සංවාතන යන්ත්‍රයකට (වෙන්ටිලේටර) සවි කර නොමැති නමුත් ඔහුට ඔක්සිජන් සහාය දෙන බව ඔහුගේ සෞඛ්‍ය තත්ත්වය සම්බන්ධයෙන් අදහස් දක්වමින් බ්‍රිතාන්‍යයේ ‘කැබිනට් කාර්යාල’ අමාත්‍ය මයිකල් ගෝ පැවැසීය.

මේ අතර අග්‍රාමාත්‍ය ධුරයේ වගකීම් දැරීමේ සහ ඉදිරි ක්‍රියාමාර්ග ගැනීමේ බලය බ්‍රිතාන්‍යයේ විදේශ ලේකම් (අමාත්‍ය) ඩොමිනික් රාබ් ට පවරා ඇත.

ඒ.එෆ්.පී./රොයිටර්ස්

055