( තිළිණි ද සිල්වා සහ රංජන් කටුගම්පොළ )

කෝවිඩ් 19 වයිරසය  ආසාදනය වී මරණයට පත්වන මුස්ලිම් ජාතිකයින්ගේ  සිරුරු ආදාහනය  කිරීම ඉස්ලාමීය  දහමට සහ ඉගැන්වීම පටහැනි  බවට පවසමින් හිටපු අමාත්‍ය සහ සමස්ත ලංකා මුස්ලිම් කොංග්‍රසයේ නායක රිෂාද් බදියුදීන් සහ එම පක්ෂයේ හිටපු  පාර්ලිමේන්තු මන්ත්‍රීවරුන් සිව් දෙනෙකු  අද (14) ශ්‍රේෂ්ඨාධිකරණය හමුවේ   මූලික අයිතිවාසිකම් පෙත්සමක් ගොනු කරනු ලැබුහ.

කෝවිඩ්  වසංගත යට ගොදුරු වී මියගිය අයගේ සිරුරු ආදාහනය  කළ යුතු බව ට රෙගුලාසි  පනවමින්  නිකුත් කර ඇති ගැසට් නිවේදනය බල රහිත කරන ලෙස ද මෙම පෙත්සම මගින් ඉල්ලා ඇත.

එස්.අමීර් අලි,ඒ.එම්. මහරූප්,හුසේන්  අහමඩ්  බහිලා මෙහි  සෙසු  පෙත්සම් කරුවෝ වෙති.

සෞඛ්‍ය  ඇමැතිනීතී පවිත්‍රා වන්නිආරච්චි, සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ , සෞඛ්‍ය  අමාත්‍යංශ ලේකම්  භද්‍රානී ජයවර්ධන ,සහ නීතිපති  මෙහි වගඋත්තර කරුවෝ වෙති.

කෝවිඩ් වසංගතයට ගොදුරු වී  මියගිය අයගේ  සිරුරු සම්බන්ධයෙන් කටයුතු කළ යුතු ආකාරය  පිළිබඳ  සදහන් කරමින්  ඉකුත් අප්‍රේල් 11වැනිදා ගැසට් නිවේදනයක් නිකුත් කර ඇති බව පෙත්සම්කරුවන් කියා සිටිති.

එහිදි " a " දරන රෙගුලාසි යට අනුව  එම සිරුරු ආදාහනය කළ යුතු යැයිද පෙත්සම්කරුවෝ පෙන්වා දෙති.එහෙත්  ලෝක සෞඛ්‍ය සංවිධානය විසින් නිකුත් කර ඇති  මාර්ගෝපදේශ  මාලාව  අනුව එම සිරුරු ආදාහනය  කිරීම හෝ මිහිදන් කිරීමට  හැකි බවද ඔවූහු සිය පෙත්සමින් කියා සිටිති.

එසේ තිබියදී  මෙරට සිදුවන  මරණ සම්බන්ධයෙන්  කටයුතු කළ යුතු ආකාරය පිළිබඳ ගැසට් නිවේදනයක් නිකුත් කර  එම සිරුරු ආදාහනය කළ යුතු බව ට රෙගුලාසි  පැනවීම  ආණ්ඩුක්‍රම ව්‍යවස්ථාව උල්ලංඝනය කිරීමක්  බව පෙත්සම්කරුවන් කියා සිටිති.

සෙසු රටවල එසේ මියගිය අයගේ සිරුරු ආදාහනය මෙන්ම භූමදාන  කරන බවද පෙත්සම් කරුවන් කියා සිටිති.

ඉස්ලාම් දහම අදහන මුස්ලිම් ජාතිකයන් එම දහමට අනුව  මිහිදන්  කල යුතුය. එහෙත්  ඊට පටහැනිව යමින්  මියගිය  අයගේ සිරුරු ආදාහනය කල බවද එය අයිතිවාසිකම්  උල්ලංඝණය කිරීමක්  බවද පෙත්සම්කරුවෝ වැඩිදුරටත් කියා සිටිති.

එබැවින් මෙම  රෙගුලාසි පනවමින් නිකුත් කර ඇති ගැසට් නිවේදනය  කියාත්මක වීම අත්හිටුවන    අතුරු  තහනම් නියෝගයක් නිකුත් කරන ලෙස  පෙත්සම්කරුවෝ අධිකරණයෙන් ඉල්ලා සිටිති.