කොරෝනා වසංගතය හේතුවෙන් ඉතාලියේ මියගිය වෛද්‍යවරුන්ගේ සංඛ්‍යාව 100 දක්වා ඉහළ ගොස් ඇත.
 
‘කොවිඩ්-19 හෙවත් නව කොරෝනා වයිරසය ඉතාලිය තුළ ව්‍යාප්ත වීම ආරම්භ වූයේ පසුගිය පෙබරවාරි මාසයේදීය. එතැන් පටන් ගෙවී ගිය කාලයේදී කොරෝනා වසංගතය හේතුවෙන් වෛද්‍යවරුන් 100 දෙනකුට ජීවිත අහිමි වී ඇතැයි එරට වෛද්‍යවරුන්ගේ සංගමය ඊයේ (9) නිවේදනය කළේය.
 
‘‘කොවිඩ්-19 හේතුවෙන් මියගිය වෛද්‍යවරුන්ගේ සංඛ්‍යාව 100ක්. අවාසනාවකට මේ අවස්ථාව වෙද්දි එය 101ක් වෙන්නත් පුළුවන්’’ යැයි ඉතාලි වෛද්‍යවරුන්ගේ සංගමයේ ප්‍රකාශකයෙක් ප්‍රංශ පුවත් සේවයට පැවැසීය. කොරෝනා වයිරසය හේතුවෙන් ඉතාලියේ වෛද්‍යවරුන් 94 දෙනකු මියගොස් ඇතැයි එරට වෛද්‍යවරුන්ගේ සංගමය ඉකුත් (7) ප්‍රකාශ කළේය. ඒ අනුව කොරෝනා වයිරසය හේතුවෙන් දින තුනක් ඇතුළත මියගිය වෛද්‍යවරුන්ගේ සංඛ්‍යාව 6කි.
 
‘කොවිඩ්-19’ නව කොරෝනා වයිරසය ආසාදනය වීමෙන් හෙදියන් 26 දෙනකු මියගොස් ඇතැයි ද ඉතාලියේ හෙද සම්මේලනයේ මාධ්‍ය ප්‍රකාශකවරයා කීය. එමෙන්ම හෙදියන් 6,549 දෙනකුට වයිරසය ආසාදනය වී ඇතැයි ද එම සම්මේලනය සඳහන් කළේය. සඳුඳා (6) වනවිට ඉතාලියේ ‘සුවසේවා’ සේවකයන් 12,681 දෙනකුට වයිරසය ආසාදනය වී ඇතැයි ද ඉතාලියේ සෞඛ්‍ය ආයතනය සඳහන් කළේය.

මුඛ ආවරණ, අත්වැසුම්, පෞද්ගලික ආරක්ෂණ උපකරණ, ආරක්ෂිත ඇඳුම් කට්ටල යනාදී වෛද්‍ය සැපයුම්වල හිඟය වෛද්‍යවරුන්ට, හෙදියන්ට, සෞඛ්‍ය වෘත්තිකයන්ට, රෝහල් කාර්යමණ්ඩලවල වයිරසය ආසාදනය වීමට ප්‍රධාන හේතුව යැයි ද සෞඛ්‍ය බලධාරීහු කීහ.
 
අල්ජසීරා ඇසුරිනි
055