(වියලුව වාර්තාකරු)
සුභ නැකතට අනුව නිවසේ අත්තිවාරම් දැමීමට එන බව පවසා දින දෙකක වැටුපත් රැගෙන පිටව ගිය පෙදරේරුවකු කිතුල් ගසක් මුල වැතිර සිටියදී හමු වූ බව කියවෙන පුවතක් ලංකාදීපයට වාර්තාවේ. 


සිද්ධිය මෙසේය.


පෙදරේරු වෘත්තියේ යෙදෙන්නෙකි. මත්පැන් පානයට ද රුසියෙකි. උදේ සිට සවස් වනතුරු ගත වෙහෙසා වැඩ කරන හෙතෙම දිනයේ වැටුපෙන් වැඩි කොටසක් වැය කළේ මත්පැන්වලටය. 


පසුගිය දිනෙක අලුතින් ඉදිවන නිවසක අත්තිවාරම් දැමීමට ඔහුට ආරාධනයක් ලැබිණි. වැඬේ බාරගත් හෙතෙම දින දෙකක වැටුප ද ඉල්ලාගෙන පිටව ගියේ පසු දින උදෑසනින්ම තමුන් පැමිණෙන බවත් අවශ්‍ය අත්උදව්කරුවන් හා උපකරණ සූදානම් කරන ලෙසත් ඉල්ලීමක් කරමිනි.


පසු දින පහන් වී හෝරා දෙක තුනක් ගත වුවත් ඔහු එන බවක් දැක ගන්නට නොලැබිණි. නැකත් වේලාවද ආසන්න වෙමින් තිබිණි. දුරකතනය ද ක්‍රියාවිරහිතව තිබිණි. පුද්ගලයා ගැන දන්නා හෙතෙම ඔහුගේ නිවසට ද ගොස් විපරම් කළේය. කලින් දින පිටව ගිය ඔහු තවමත් ගෙදර නො ආ බව ඔහුගේ  බිරිය ද කීවාය. 


ඔහු ගැන සොයා බලද්දී යම් හෝඩුවාවක් ලැබිණි. හෝඩුවාව ඇත්තකි. පදම වැඩි වූ ඔහු ඒ වන විටත් ගමේ කිතුලක් පාමුල ගල්තාලවක මර නින්දේ පසුවනු දැක ගන්නට ලැබිණි.