පෙම්වතියන් දෙදෙනකුට පෙම් කළ 21 හැවිරිදි පෙම්වතෙක් 18 හැවිරිදි පැරැණි පෙම්වතිය අතහැර 14 හැවිරිදි බාල වයස්කාර අලුත් පෙම්වතිය රැගෙන පලාගොස් ඇතැයි ඇල්ල පොලිසිය පවසයි. 


පෙම්වතියන් දෙදෙනා ද මිතුරින් වන අතර පෙම්වතා එකිනෙකාට හසු නොවන සේ දෙදෙනාට පෙම් කර තිබේ. කෙසේ නමුත් 27දා මේ රහස හෙළිවීමත් සමඟ මිතුරියන් දෙදෙනා අතර රණ්ඩුවක් වී ඇත.


බාලවයස්කාර පෙම්වතිය වහාම ගොස් මේ ගැටුම පිළිබඳව පෙම්වතාට පවසා තිබේ. ඔහු ඇය සමගම අනෙක් පෙම්වතිය හමුවීමට ගොස් ප්‍රශ්නය නිරාකරණය කර ගැනීමට උත්සාහ කළ ද පෙම්වතා බෙදාගැනීමට බැරිව දෙදෙනා කෙස්වලු පටලවාගෙන තිබේ.


ඉන් පසු පරණ පෙම්වතිය හඬා වැටෙද්දී පෙම්වතා බාලවයස්කාර අලුත් පෙම්වතිය රැගෙන පලා ගොස් තිබේ.


බාල වයස්කාර පෙම්වතියගේ පියා විසින් තම දියණියගේ අතුරුදන් වීම පිළිබඳව පොලිසියට පැමිණිලි කළ බවත් ඒ අනුව කළ විමර්ශනවලදී මේ තොරතුරු අනාවරණය වූ බවත් ඇල්ල පොලිසිය පවසයි.


බණ්ඩාරවෙල පොලිස් අධිකාරි සුදත් මාසිංහ හා සහකාර පොලිස් අධිකාරි ජයන්ත රත්නායක යන මහත්වරුන්ගේ උපදෙස් මත ඇල්ල පොලිස් ස්ථානාධිපති පොලිස් පරීක්ෂක එල්.ඩී.එන්. කරුණාරත්න මහතාගේ මෙහෙයවීම යටතේ ඇල්ල පොලිසිය වැඩිදුර විමර්ශන සිදු කරයි.

(බදුල්ලේ - පාලිත ආරියවංශ සහ ඇල්ල - ප්‍රසාද් රුක්මල්)