සිය  සැමියා යයි සිතා වෙනත් පුද්ගලයකුගේ යතුරු පැදියකට ගොඩ වූ කාන්තාවකට සිදුවූ  අකරතැබ්බයක් පිළිබඳ පුවතක් පසුගියදා දකුණු පළාතෙන් වාර්තා විය.

ඔහු විශ‍්‍රාමිකයෙකි. සිය දරුවාගේ උපකාරක පන්තිය  පිහිටුවා තිබුණේ දකුණේ නගරයකය. දරුවාට උදෑසන  5.00ටද උපකාරක පන්තියකට සහභාගිවීමට නියමිතව තිබිණි. සිය බිරිය හා දරුවා සමග විශ‍්‍රාමිකයා උදෑසන 4.30ට පමණ උපකාරක පන්තිය අසලට පැමිණියේය. ඒ වනවිටත් එම ස්ථානය කළුවරව පැවතිණි.

බිරිය දරුවා සමග උපකාරක පන්තිය පවත්වන දෙමහල් ගොඩනැගිල්ල වෙත පිටත්ව ගියාය.

සුළු වේලාවක දී කාන්තාවක් පැමිණ විශ‍්‍රාමික රජයේ සේවකයාගේ පිටට අත් දෙක තබා ගෙන යතුරුපැදියට නැග හරියැයි කිවාය. ඒ සමගම විශ‍්‍රාමික සේවකයා යතුරුපැදිය පණ ගන්වා නිවෙසට යාමට පිටත්ව ගියේය. හන්දියක් පසුකරන විටම එහි පිටුපස ගිය කාන්තාව මහ හයියෙන් කෑ ගසා බයිසිකලය නවතා ගත්තාය.

සයිකලයේ පසු සිටියේ විශ‍්‍රාමික සේවකයාගේ බිරිය නොව වෙනත් කාන්තාවකි. ඇය එසැනින් බැස්සාය.                              

ඇබැද්දිය කළුවරේදී සිදුවූ බව ඇයටද වැටහිණි. ඉන් අනතුරුව විශ‍්‍රාමික සේවකයා උපකාරක පන්තිය අසලට යනවිට ඔහුගේ බිරිය පාර අසලටවී සිටියාය.