(මොරගොල්ලාගම සිසිර කැලේගම)
තම නාමයට අපහාස වෙන අන්දමින් මාළු විකුණන්නේ යැයි කියමින් නිවෙස් හිමියෙකු ජංගම රථයෙන් මාළු අලෙවි කරන්නෙකුට පහර දීමට තැත් කිරීමේ පුවතක් වයඹ ප්‍රදේශයෙන් අසන්නට ලැබුණි.


 වාර්තා වූ අන්දමට සිද්ධිය මෙසේය.


 ඔහු නමින් පියදාසය.


 මේ නිසා ගමේ කවුරුත් ඔහුට ආදරයට “පියා” යන නමින් ආමන්ත්‍රණය කළේය. ගමේ වැඩිහිටියන් “පියා පුතා, පියා මල්ලී කියා ද අනෙකුත් අය පියා අයියා, පියා මාමා යන නම්වලින් ද අමතන ලදී.


ඔහු එදින සවසත් පදමට වෙරි වී පාර දිගේ ගමන් කරමින් සිටින විට සුපුරුදු ලෙසට ප්‍රදේශයේ මාළු අලෙවි කරන රථය ද ශබ්ද විකාශනයක් මගින් ‘අංගුලුවා, සැමන්, බෝල්ලු, සාලයා, පියා මැස්සා ලාබයි ලාබයි’ යනුවෙන් ඔවුහු මාළු විකුණූහ.


 ඈතින් එන රථය ළඟට ආ විගස ඔහු වහා පාර මැදට පැන එය නතර කළේය.


 මහත්තයාට මොන මාළු ද ඕනෑ. අලෙවිකරු රථයෙන් බිමට බැස ඔහුගෙන් ඇසීය.


‘මාළු මට එපා. මගේ වැදගත් නමට අපහාස වෙන ලෙසට මගේ නම මාළුන්ට සමකොට මින් පස්සේ මෙහේ මාළු විකුණන්න එන්න බැහැ තේරුණා ද?’ ඔහු මාළු වෙළෙන්දාගේ බෙල්ලෙන් අල්ලා පහර දීමට තැත් කළේය.


 පිටස්තර ප්‍රදේශයකට පිවිසි මාළු වෙළෙන්දා ද කියන දේ තේරුම් ගැනීමට නොහැකිව බියට පත්ව ඉන් බේරී යාමට උත්සාහ කළේය.


 මේ අතර ගමේ තරුණ පිරිසක් එතැනට පැමිණ දෙදෙනා දෙපසට කළේය.


 පියා මාමට අපහාස වෙන ලෙසට පියාමැස්සා විකුණා ඇතැයි ඔවුහු උසුළු විසළු කරමින් කාරණාව පැහැදිලි කළහ.


ඒ අනුව කාරණාව තේරුම් ගත් මාළු වෙළෙන්දා ද සිනාසෙමින් සුපුරුදු ලෙසට මාළු අලෙවි කිරීම සඳහා නික්මුණේය.