‘කොවිඩ්-19’ හෙවත් නව කොරෝනා වයිරසය හේතුවෙන් සෑම මිනිත්තුවකදීම ඇමෙරිකා එක්සත් ජනපදයේ පුද්ගලයකු මරණයට පත්ව ඇතැයි රොයිටර් පුවත් සේවය වාර්තා කරයි.

ඇමෙරිකා එක්සත් ජනපදයෙන් මේ වනවිට වාර්තා වන නව කොරෝනා වයිරස සමස්ත මරණ ගණන 150,000 ඉක්මවා ගොස් තිබේ. ලොව වැඩිම වයිරස ආසාදිත මරණ ගණනක් වාර්තා වන්නේ ද ඇමෙරිකා එක්සත් ජනපදයෙනි.

ඇමෙරිකා එක්සත් ජනපදයෙන් බදාදා දිනයේදී නව කොරෝනා වයිරස ආසාදිත මරණ 1,461ක් වාර්තා විය. පසුගිය මැයි මස 27 වැනිදාට පසු ඇමෙරිකාවෙන් දිනක් ඇතුළත වාර්තා වැඩිම මරණ ගණන ද එය යි. ඇමෙරිකාවෙන් මැයි 27 වැනිදා වාර්තා වූ වයිරස ආසාදිත මරණ ගණන 1,484කි.

ඇමෙරිකා එක්සත් ජනපදයෙන් පසුගිය දින 11 කාලයේදී වයිරස ආසාදිත මරණ 10,000 ඉක්මවා වාර්තා විය. ඉකුත් ජූනි මාසයෙන් පසු ඇමෙරිකාවෙන් වේගයෙන්ම මරණ වාර්තා වූ දින 11 ලෙස ද එම දින සැලකේ.

අවසන් සති තුන සැලකිල්ලට ගැනීමේදී ඇමෙරිකා එක්සත් ජනපදයෙන් දෛනිකව වාර්තා වන මරණ ගණන වැඩි වී තිබෙන නමුත් වාර්තා වන ආසාදිතයන්ගේ ගණන අඩු වී තිබේ. ඒ් අනුව ඉකුත් ජූනි මාසයෙන් පසුව පළමු වරට අඩු වී තිබේ.


රොයිටර්
055