(  සිතුම් චතුරංග)

        වවුනියාව , සාලම්බකුලම් ගම්මානයෙන් කොවිඩ් - 19  වයිරසය ආසාදිත කාන්තාවක හා කුඩා දරුවකු හදුනාගැනීමත් සමඟ අද(12) සිට එම ගම්මානය නැවත දැනුම්දෙන තෙක් හුදකලා කිරීමට පියවරගත් බව වවුනියාව ප්‍රාදේශිය සෞඛ්‍ය වෛද්‍ය නිලධාරී කාර්යාලය පවසයි.

        පසුගියදා කොළඹ සිට පැමිණ ඇති මවක හා ඇගේ කුඩා දරුවාට වැළඳුණු උණ රෝගී තත්වයක් හේතුවෙන් සිදුකළ පී.සී.ආර් පරීක්ෂාවකදී කොවිඩ් - 19 වෛරසය ආසාදනයවී ඇති බවට අනාවරණයවූ බවද සඳහන් කළේය.

        එලෙස වෛරසය ආසාදනයවී ඇත්තේ වයස අවුරුදු 27 කාන්තාවකට හා වයස අවුරුදු පහක් වන කුඩා දරුවකුට වේ.

        අසාදිත කාන්තාව ප්‍රදේශයේ නිවාස කිහිපයකට ගමන්කොට ඇති අතර එම තත්වය සැලකිල්ලට ගනිමින් සාලම්බකුලම් ගම්මානය හුදකලා කිරීමට පියවරගත් බව ප්‍රදේශිය සෞඛ්‍ය වෛද්‍ය නිලධාරී කාර්යාලය පැවසීය.

          ගම්මානයේ පවුල් 382 ක් පමණ මේ වනවිට හුදකලා කොට ඇති අතර එම කාන්තාව සමීපව ඇසුරුකළ පවුල් පහක පුද්ගලයින් කිහිපදෙනකුගේ පී.සී.ආර් සඳහා ජෛව සාම්පල ලබාගත් බවද ප්‍රකාශ කළේය.

        මේ වන විට සාලම්බකුලම් ගම්මානයට ඇතුළුවීම හා පිටවීම වළක්වමින් ආරක්ෂක අංශ විසින් තාවකාලිකව මුරපොළවල් ඉදිකොට මාර්ග වසා දමා තිබේ.

        ඇසුරු කළ පුද්ගලයින්ගේ පී.සී.ආර් වාර්තා අනුව තවදුරටත් ගම්මානය හුදකලා කිරීම සිදුකරන බවට සාකච්ඡා කිරීමෙන් අනතුරුව තීරණයක් ගන්නා බවද වවුනියාව ප්‍රාදේශිය සෞඛ්‍ය වෛද්‍ය නිලධාරී කාර්යාලය වැඩිදුරටත් පැවසීය.