අසල්වැසි ඉන්දියාවෙන් අද (11) පස්වරුවෙන් අවසන් වූ පැය 24 කාලයේදී නව කොරෝනා වයිරස ආසාදිතයන් 96,551 දෙනකු හඳුනාගත් බව එරට සෞඛ්‍ය අමාත්‍යාංශය සඳහන් කරයි.

එම ගණන ‘කොවිඩ්-19’ හෙවත් නව කොරෝනා වයිරස වසංගතය ලොව පුරා පැතිර යෑමට පටන් ගැනීමෙන් පසු ලොව ඕනෑම රටකින් දිනක් ඇතුළත වාර්තා වූ වැඩිම නව කොරෝනා වයිරස ආසාදිතයන් ගණන වේ.

ඉකුත් වසරේ දෙසැම්බර් මාසයේ දී මුල් වරට හඳුනාගත් නව කොරෝනා වයිරසය චීනයේ හුබෙයි පළාතේ වූහාන් නගරයෙන් ආරම්භ වී ලොව පුරා පැතිර යෑමට පටන් ගත්තේය.

අවසන් පැය 24 දී වාර්තා වූ ආසාදිතයන්ගේ ගණනත් සමඟ ඉන්දියාවෙන් වාර්තා වන නව කොරෝනා වයිරස ආසාදිතයන්ගේ සමස්ත ගණන මිලියන 4.5 ඉක්මවීය. ඒ අනුව එරටින් වාර්තා වන වයිරස ආසාදිතයන්ගේ සමස්ත ගණන 45,62,414ක් ලෙස දැක්විණි.

අවසන් පැය 24 දී ඉන්දියාවෙන් ‘කොවිඩ්-19’ වයිරස ආසාදිත මරණ 1,209 ක් වාර්තා වූ ඒ අනුව එරටින් වාර්තා වන වයිරස ආසාදිත සමස්ත මරණ ගණන 76,271ක් දක්වා ඉහළ ගියේය.

මේ වනවිට ඉන්දියාවේ රෝහල්වල ප්‍රතිකාර ලබන නව කොරෝනා වයිරස ආසාදිත රෝගීන්ගේ ගණන 9,43,480ක් වන අතර සුවය ලැබූ ගණන 35,42,663ක් වේ.

එන්.ඩී.ටීවී.

055