(කාංචන කුමාර ආරියදාස)
 
දඹුල්ල-කුරුණෑගල ප්‍රධාන මාර්ගයේ දඹුල්ල රෝහල ආසන්නයේ දී යතුරුපැදියක් සහ ටිපර් රථයක් ගැටී සිදුවූ අනතුරකින් පොලිස් කොස්තාපල්වරයෙකු මියගොස් ඇතැයි දඹුල්ල පොලීසිය කියයි.
 
මෙසේ මියගොස් ඇත්තේ යතුරුපැදියේ ගමන් කරමින් සිටි හබරණ පොලීසියට අනියුක්තව සේවය කරන පොලිස් කොස්තාපල් එම්. ඩබ්ලිව්. යු.පි.කේ බණ්ඩාර (7339 5)  වයස අවුරුදු 32 ක් වූ   තොරතුරු  තාක්ෂණ නිලධාරිවරයා බව දඹුල්ල පොලිසිය සඳහන් කර සිටී.
 
පොලිස් කොස්තාපල්වරයා සේවය අවසන් වී ගලේවෙල ප්‍රදේශයේ නිවස බලා ගමන් කරමින් තිබියදී මෙම අනතුර සිදු වී තිබෙන බව පොලිසිය කියයි.
 
පොළොන්නරුව ප්‍රදේශයේ සිට කොළඹ ප්‍රදේශයේ ද වැලි ප්‍රවාහනය කරමින් තිබූ ටිපර් රථයක ගැටීමෙන් මෙම අනතුර සිදුවී තිබේ.
 
ටිපර් රථයේ රියදුරු පොලිසියට ප්‍රකාශකර ඇත්තේ තමන් වතුර පානය කිරීම සදහා මාර්ගය අසළ වාහනය නවතනවාත් සමඟ පිටුපස ශබ්දයක් ඇසුණු බවත් තමන් වාහනයෙන් බැස බලද්දී යතුරුපැදිය ටිපර් රථයේ පිටුපස ගැටී අයකු වැටී සිටිනු දැක අවට කීපදෙනකුගේ උදව් ඇතිව රෝහලට රැගෙන ගිය බවයි.

තුවාල ලැබූ පොලිස් කොස්තාපල්වරයා දඹුල්ල මූලික රෝහලට ඇතුළත් කිරීමෙන් පසුව මිය ගොස් තිබේ .සැකපිට ටිපර් රථයේ රියදුරු අත්අඩංගුවට ගෙන ඇත.

මියගිය පොලිස් කොස්තාපල්වරයා දෙදරු පියෙකි. දඹුල්ල පොලිසිය පරීක්ෂණ පවත්වයි.