(නිශාන්ත කුමාර )
රිදීමාලියද්ද පොලිස් වසමට අයත් ආඳාඋල්පත ගලහිටියාව වැව ආසන්නයේ දී සැකකටයුතු ලෙස මිය ගොස් සිටි පුද්ගලයාගේ මරණය සම්බන්ධයෙන් එම ප්‍රදේශයේම පුද්ගලයකු සැකපිට අත්අඩංගුවට ගත් බව රිදීමාලියද්ද පොලීසිය පවසයි.
කෙසේ වෙතත් මරණය සම්බන්ධයෙන් සැකයක් පවතින බැවින් මිය ගිය පුද්ගලයාගේ සිරුරේ කොටස් වැඩිදුර පරීක්ෂණය සදහා මහියංගන මහේස්ත්‍රාත්වරයාගේ නියෝගය මත රජයේ රස පරීකෂකවරයා වෙත යොමුකළ බවද පොලීසිය පැවසීය.
සිද්ධියෙන් මියගොස් සිටියේ ඌරණිය ආදාඋල්පත පහළ බටුයාය පදිංචි එම් බී සේනාරත්න නැමැති පුද්ගලයෙකි.
.මොහු ඉකුත් 21 දින උදෑසන ඇදිරි නීතිය පනවා තිබියදී නිවසින් පිටව ගොස් නැවත නිවසට නොපැමිණි බවට මියගිය අයගේ බිරිඳ විසින් පැමිනිල්ලක් කර තිබූ අතර ඉකුත් 22 දින අතුරුදන්වූ පුද්ගලයාගේ සිරුර ගලහිටියාව වැව අසල තිබී පොලීසියට හමුවිය.
මියගිය පුද්ගලයා ගලහිටියාව වැව ආසන්නයේ දී පිරිසක් සමග මත්පැන් පානය කළ බවටද පොලිසිය වෙත තොරතුරු ලැබී තිබිනි
එසේම තම ගෙවත්තට වන අලි ඇතුලුවීම වැළැක්වීම සඳහා අදින ලද විදුලි රැහැන් කීපයක්ද පොලිස් නිලධාරීන්ගේ අවධානයට ලක්ව ඇත.
ඉදිරිපත්වූ තොරතුරු සැලකිල්ලට ගත් මහියංගන මහේස්ත්‍රාත්වරයා මෙය සැකකටයුතු මරණයක් බැවින් විදුලි රැහැන් අදින ලද පුද්ගලයා අත්අඩංගුවට ගන්නා ලෙසත් මියගිය පුද්ගලයාගේ සිරුරේ කොටස් රජයේ රස පරීක්ෂකවරයා වෙත යොමුකර උසාවිය වෙත වාර්තාවක් ඉදිරිපත්කරන ලෙසත් පොලිසියට නියෝග කළේය.
රිදීමාලියද්ද වැඩබලන පොලිස් ස්ථානාධිපති පොලිස් පරීක්ෂක ආර්. පී වීරකෝන් මහතාගේ උපදෙස් පරිදි රිදිමාලියද්ද පොලිසිය වැඩිදුර පරීක්ෂණ පවත්වයි
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
