මාතර ත්‍රිරෝද රථ රියදුරෝ උද්ඝෝෂණයක
(ක්‍රිෂාන් ජීවක ජයරුක්)
මාතර ප්‍රධාන බස් නැවතුම් පොළ අසල ත්‍රිරෝද රථ ගාල ඉවත් නොකරන්නැයි බල කරමින් එහි රියදුරුවරු පිරිසක් අද (10) පොලීසියට එරෙහිව උද්ඝෝෂණ ව්‍යාපාරයක නිරතවුහ.
විශේෂයෙන් ඔවුන් ප්‍රකාශ කළේ මාතර පොලිස් කොට්ඨාස රථ වාහන ඒකකය එම ස්ථානයේ ත්‍රිරෝද රථ නතර කිරීමට සීමා පනවා ඇති බවයි.
ඒ පිළිබඳව අදහස් දැක්වූ සමස්ත ලංකා ත්‍රිරෝද රථ හා හිමිකරුවන්ගේ සංගමයේ මාතර දිස්ත්‍රික් සභාපති එම්.එච්.සුමනපාල මහතා මෙසේ කීය.
“මෙම ත්‍රිරෝද රථ ගාල වසර 30 වඩා පැරණියි. අපිට ත්‍රිරෝද රථ නතර කරන්න මාතර මහ නගර සභාව පවා අවසර ලබා දී තිබෙනවා. ඒ වෙනුවෙන් අපි ටිකට් පවා මුදල් ගෙවා අරන් තිබෙනවා. නමුත් මාතර කොට්ඨාස රථවාහන ඒකකය ඇවිත් එක්වරම අපේ රථ ඉවත් කරන්න කීවා. එක වරකට ත්‍රිරෝද රථ තුනක් පමණක් තබාගෙන අනෙක් ඒවා ඊට පසුව නවත්වන්න කියනවා. ඒක ප්‍රායෝගික ක්‍රියාවක් නොවෙයි.
මහා මාර්ගයේ තදබදය අවම කරන්න ගත්ත තීරණයක්ලු. අපි පාර අයිනේ අඩි තුනයි අරන් තිබෙන්නේ. නමුත් පාර අවහිර කරන්නේ පෞද්ගලික බස් රථ රියදුරන්. එහෙත් දවසේ වේල හොයා ගෙන කන අපිව දැන් එලවන්න හදනවා. මේ රස්සාව නැති වුණොත් අපේ මිනිස්සුන්ට වෙන්නේ සොරකම් කරන්න. කුඩු ගංජා විකුණන්නයි. කාටවත් කරදරයක් නැතිව ජීවත් වූ අපට මේ රැකියාව කර ගන්න ඉඩ ලබාදෙන මෙන් ඉල්ලා සිටිනවා.”
කෙසේ වෙතත් එම ස්ථානයට පැමිණි මාතර කොට්ඨාස රථ වාහන අංශයේ ස්ථානාධිපති ඩී.එම්.දිසානායක මහතා හා විරෝධතාවයේ නිරත ත්‍රිරෝද රථ රියදුරන් සමඟ උණුසුම් තත්වයක් ඇති විය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
