(දසුන් රාජපක්ෂ)

ඩෙංගු වසංගතය මර්දනය කිරීම සදහා අදියර තුනකින් යුත් නව වැඩපිළිවෙලක් ක්‍රියාත්මක කරන බව සෞඛය සේවා අධ්‍යක්‍ෂ ජෙනරාල් වෛද්‍ය අනිල් ජාසිංහ මහතා (13) පැවසීය.

එහි පළමු අදියර ලෙස ඩෙංගු රෝගය බහුලවම ව්‍යාප්ත වී ඇති ප්‍රදේශවල කීට විද්‍යා සමීක්ෂණ සිදුකිරීමට නියමිතව ඇති අතර රෝගීන් සහ පාරිසරික තත්ත්වයන් එහිදී අධ්‍යයනය කෙරෙන බව වෛද්‍ය අනිල් ජාසිංහ මහතා සඳහන් කළේය.

දෙවැනි අදියර යටතේ දිවියිනේ සියලු රෝහල්වල 'දැඩි උපස්ථාන ඒකක' නමින් නව ඒකකයක් ස්ථාපිත කොට ඩෙංගු රෝගීන්ට පමණක් ප්‍රතිකාර කෙරෙන සේවයක් ආරම්භ කිරීමට නියමිතව ඇත.

'දැඩි උපස්ථාන ඒකකවල' සේවය කිරීම සදහා ඩෙංගු රෝගය සම්බන්ධයෙන් විශේෂ පුහුණුවක් ලබාදුන් වෛද්‍යවරුන් සහ හෙද හෙදියන් අනුයුක්ත කෙරෙන අතර අධි තාක්ෂණික වෛද්‍ය උපකරණ සහ යන්ත්‍ර එම ඒකකයට ලබාදීමට යෝජිත බව අනිල් ජාසිංහ මහතා පැවසීය.
 
පසුගිය ආණ්ඩුව යටතේ නවතා දැමූ යුද හමුදාව යොදාගෙන ඩෙංගු මර්දන වැඩසටහන් ක්‍රියාත්මක කිරීම නැවත වරක් ආරම්භ කර වැඩිදියුණු කළ ක්‍රමවේදයන් යටතේ එක් මසකට දෙවතාවක් බැගින් ඩෙංගු මර්දන විශේෂ වැඩසටහන් තෙවැනි අදියර යටතේ ක්‍රියාවට නංවන බව ඒ මහතා කීය.
 
කුමන වැඩසටහනක් ක්‍රියාවට නැංවුවද ඩෙංගු රෝගය සියයට සීයක් මර්දනය කළ නොහැකි බැවින් දැනුම්වත්ව සිට ඩෙංගු කීටයන් බෝවීම වළක්වා ගැනීම පුරවැසියන්ගේ වගකීම බව ඔහු වැඩිදුරටත් පවසා සිටියේය.