(*** මාවනැල්ල විශේෂ පී. ශාන්ත බණ්ඩාර)

බීමත්ව රිය පැදවීමේ වරදකට මාවනැල්ල මහේස්ත්‍රාත් අධිකරණයෙන් පෙරේදා (16) වරදකරු කළ වෙළෙඳ ව්‍යාපාරිකයකු උදේ 11.30 ට පමණ රුපියල් 25,000 ක දඩ මුදල ගෙවා අධිකරණ භූමියෙන් පිටතට ගොස් මත්පැන් පානය කර නැවත රිය පැදවීමේ වරදට එදිනම ප.ව. 2.00 ට පමණ අත්අඩංගුවට ගත් බව මාවනැල්ල පොලිසිය කියයි.

දඩ මුදල ගෙවා අධිකරණ භූමියෙන් පිටතට ගොස් තවත් පුද්ගලයකු හා කාන්තාවක් සමග අවන්හලකට ගොස් ඇති එම ව්‍යාපාරිකයා එහිදී මත්පැන් පානය කර වාහනය පදවාගෙන යාමේ දී උතුවන්කන්ද ප්‍රදේශයේ දී අත්අඩංගුවට ගත් බව ද පොලිසිය පවසයි.

අපරික්ෂාකාරීව රිය පදවන බවට පොලිසියට ලැබුණු පැමිණිල්ලක් මත වහා ක්‍රියාත්මක වූ පොලිසිය එම වාහනය නතර කිරීමට උත්සාහ ගත්ත ද බීමත් රියැදුරා අවස්ථා දෙකකදීම පොලිස් නිලධාරීන්ගේ ඇඟට වාහනය කපා පළා යෑමට උත්සාහ ගත් බව ද පොලිසිය කියයි.

ඉන්පසුව උතුවන්කන්ද ප්‍රදේශයේ දී වාහන හරස්කර මාර්ගය අවහිර කර ඔහු සහ ඔහු සමග ගිය අනෙක් දෙදෙනා අත්අඩංගුවට ගත් බව ද පොලිසිය සඳහන් කරයි.

අධිකරණය මුල් වතාවේ දී බීමත්ව රිය පැදවූ එම ව්‍යාපාරිකයාට දඩ මුදල නියම කර රියැදුරු බලපත්‍රය මාස තුනකට අත්හිටුවා තිබිණි.

එම ව්‍යාපාරිකයා අධිකරණ භූමියෙන් පිටතට ගොස් ඇත්තේ පෙරවරු 11.30 ට පමණ වන අතර නැවත පොලිසියට හසුවන විට දහවල් 2.00 පමණ වී තිබුණු බව ද පොලිසිය කියයි.

පසුව ඔහු ශ්වසන පරීක්ෂාවකට ලක්කර අධිකරණ වෛද්‍ය නිලධාරිවරයා වෙත ඉදිරිපත් කිරීමෙන් පසු මාවනැල්ල රෝහලට ඇතුළත් කර පොලිස් ආරක්ෂාව යටතේ ප්‍රතිකාර ලබයි.

මෙම රියදුරු සමග ගිය අනෙක් තැනැත්තා ද බීමත්ව සිටි නිසා ඔහු ද අත්අඩංගුවට ගෙන ඇති අතර මෝටර් රථයේ සිටි කාන්තාව නිදහස් කර ඇත.

අණ නොතකා අපරික්ෂාකාරීව ධාවනය කිරීම, බීමත්ව රිය පැදවීම, මිනිස් ජීවිතවලට හා දේපළවලට හානි සිදු කිරීමට තැත් කිරීම යන කරුණු යටතේ රියැදුරු නැවතත් අධිකරණයට ඉදිරිපත් කිරීමට නියමිතය.

මාවනැල්ල පොලිසියේ ස්ථානාධිපති ප්‍රධාන පොලිස් පරීක්ෂක ආර්.එම්.ආර්. රත්නායක සහ රථ වාහන අංශයේ ස්ථානාධිපති පොලිස් පරීක්ෂක ජේ.ආර්. ලක්මාල් යන මහත්වරු බීමත් රියැදුරා අත්අඩංගුවට ගත්හ.