(ජයන්ත සමරකෝන්)
 
වීරවිල බන්ධනාගාරයේ නිලධාරීන් 15දෙනෙකු සහ රැඳවියන් 12දෙනෙකු බන්ධනාගාරය තුළ නිරෝධායනයට ලක් කර ඇතැයි එම බන්ධනාගාර ආරංචි මාර්ග අනාවරණය කරයි.
 
මෙම නිලධාරීන් වැලිකඩ, පූනානි, කන්දකාඩු යන ස්ථානවල රැඳවියන් රැගෙනයාම හා රැගෙන ඒමට සම්බන්ධ වී ඇති අතර, රැඳවියන් පිරිස වැලිකඩ බන්ධනාගාරයේ සිට රැගෙනවිත් ඇතැයි පැවසේ.
 
මෙම පිරිස දින 14ක කාලයක් සඳහා නිරෝධායනයට ලක්කර ඇතැයිද වාර්තා වේ.
 
මේ අතර කොළඹ රක්ෂිත බන්ධනාගාරයේ නිලධාරීන් දෙදෙනෙකු උණ රෝගය සහ උගුරේ වේදනාව ඇති බව කියමින් කොළඹ ජාතික රෝහලට ඇතුළත් කර ඇතත් ඔවුන්ට කොරෝනා ආසාදනය වී නොමැති බව පරීක්ෂණවලදී හෙළි වී තිබේ.
 
වැලිකඩ බන්ධනාගාර රෝහලෙන් ඉකුත් 11 දා කොරෝනා ආසාදනය වූ තවත් රැඳවියන් හමුවීමත් සමඟ ම මෙම රෝහලේ සියලු රැඳවියන් හා කාර්ය මණ්ඩලවල 350ක් පමණ පී. සී.ආර් පරීක්ෂණයට යොමුකර ඇතැයි එම රෝහල් ආරංචි මාර්ග අනාවරණය කරයි.