(වියලුව වාර්තාකරු) 
උත්සවයක් වෙනුවෙන් රැගෙන ආ ශබ්දවිකාශන ස්පීකරයක් ගස් බඳිමින් සිටියදී කිසියම් අයෙකු විසින් හිටි වනම එය ක්‍රියාත්මක කිරීම නිසා කලබලයට පත් ගසේ සිටි පුද්ගලයා  ස්පීකරයද සමග ගසින් බිමට ඇද වැටී තුවාල ලබා රෝහල්ගත කිරීමට සිදුවීමේ පුවතක් වාර්තා විය.

සිද්ධිය මෙසේය.

එය ප්‍රදේශයේ එක්තරා ආයතනයකි.

එහි සේවක පිරිස සංවිධානය කළ උත්සවයකි.

සංග්‍රහ කටයුතු, සැරසිලි ආදී සියල්ල සූදානම් කළ ඔවුහු උත්සව දින සවස් යාමයේ එය ප්‍රදේශයටම ඇසීමට සැලැස්වීම සඳහා ශබ්ද විකාශන යන්ත්‍රයක් යෙදවීමටද තීරණය කර තිබිණි.

අනුව ගස් නැගීමට හැකියාවක් තිබූ තරුණයෙකු ස්පීකර් කට්ටලයද රැගෙන ගසකට ගොඩවී එය ගසේ ඉහළම අත්තකට තබා ගැටගසන්නට උත්සාහ කළේ  ඉන් වැඩි ප්‍රයෝජනයක් අත්කර දීමේ අරමුණෙනි.

ඒ අතරතුර එහි අනෙක් කෙළවරෙහි තිබූ යාන්ත්‍රික කොටස්වලට වයර් සම්බන්ධ කරමින් සිටි කාර්මිකයකු එය නිසි පරිදි ක්‍රියා කරන්නේද දැයි සොයා බැලීම සඳහා එය ක්‍රියාත්මක කරනු ලැබූ අතර ඉන් පිටවූ අධික ශබ්දයෙන් දැඩි සේ කලබලයට පත් ගස උඩ සිටි පුද්ගලයා අඩක් ගැටගසා තිබූ ස්පීකරයද සමග අඩි විස්සක් පමණ වූ ගසින් පහළට ඇදවැටුණේ ආයතනයේ සෙසු සේවක පිරිසද අන්ද මන්ද කරමිනි.

වාසනාවකට මෙන් සුළු තුවාල කිහිපයක් සිදුව තිබූ ඔහු රෝහල්ගත කොට පැය කීපයකින් යළිත් උත්සවය වෙත කැඳවාගෙන ඒමට ආයතනයේ පිරිස් කටයුතු කළහ.