(බුලත්සිංහල - ලක්ෂ්මි කුඩලිගම)
පියාගේ මළගමට පැමිණි මිතුරා මළගෙදරට ගොඩවෙන්නටත් පෙර තමාගේ මෝටර් රියේ සවිකළ කැසට් යන්ත්‍රය මහ හයියෙන් දමා එහි පවර් එක පෙන් වූ පුතෙක් බස්නාහිර එක්තරා ගමකින් වාර්තා විය.

වාර්තා වන අන්දමට සිද්ධිය මෙසේය.

කලක් රෝගාතුරව සිටි පියා මියගියේය. අගනුවර කාර්යාලයක සේවය කරන පුතාගේ හිතවතුන් වැල නොකැඩී මළගෙදරට ආවේ ශෝකය ප්‍රකාශ කිරීමටය. තමාගේ මෝටර් රිය මිතුරන්ට පෙන්වීමට හොඳම අවස්ථාව කරගත් මේ පුතා මෝටර් රිය මිදුලේ කොනකට වන්නට නතර කර තැබීය.

සිය හිතවතාගේ පියාගේ අවසන් කටයුතුවලට සහභාගී වීම සඳහා මිතුරකු උදෑසනින්ම මළගෙදරට ගියේය. ඔහු නිවෙසට ගොඩවන්නටත් පෙර ඔහුව පිළිගත් මේ පුතා ඔහු අමතා ‘මචන් මේ තියෙන්නේ මගේ කාරෙක. අපි යමු ද මේකෙන් පන්සලට ගිහින් එන්න’ කියා ඔහුත් ඇදගෙන කාරෙකට ගොඩවිය.

මෝටර් රිය පණගන්වාගත් ඔහු ප්‍රධාන පාරට රථය හරවා නතර කළේය. ‘මචන් මේ තියෙන්නේ මේකට ළඟදි හයිකරපු කැසට් යන්ත්‍රය. කොහොමද බලපන් සද්දේ’ කියා කැසට් යන්ත්‍රය මහ හයියෙන් සින්දුවක් දමා ඉදිරියට පැදවීය. පැමිණි මිතුරාට කේන්තිය ඉවසා සිටීමට බැරිම තැන ‘යකෝ මේ මැරිල ඉන්නේ උඹගේ තාත්තා නේද’ කියා ඇසීය.

‘ඔව් බං ප්‍රශ්නයක් නෑ එයා වයසයිනේ. ගණන් ගන්න එපා. එයා හිටියෙත් මල්ලිගේ ගෙදරනේ.’ 

‘ආ එහෙම ද තාත්තාගේ අසනීපේ ගැන කියල නිවාඩු ගත්තෙ බොරුවටද’ යි ඇසූ මිතුරාට යකා නැග්ගේය. ‘මේ උඹ වගේ පුතෙක් හදාපු උඹලෑ තාත්තාට අමා මහා නිවන් සුවම අත්වේවා. කරුණාකර ඔතනින් නවත්තපන් මට බහින්න’ කියූ මිතුරා මගින් බැස කොළඹ දෙසට යන බස් රථයකට ගොඩ වුණාලු.