සිය බිරිඳ සමග ඡන්ද ඔට්ටුවක් ඇල්ලූ තරුණ දෙදරු පියෙකුට සතියක කාලයක් සිය නිවසෙහි සියලු මෙහෙවර කිරීමට නියම වූ පුවතක් මාතර නගරය සමීපයේ ගමකින් වාර්තා වෙයි.

පෞද්ගලික ආයතනයක සේවයේ නිරත සැමියා ප්‍රධාන පක්ෂයක ජනාධිපති අපේක්‍ෂකයකුට සහය පළ කළේය. ඔහුගේ බිරිඳ අනෙක් අපේක්‍ෂකයා ජයග්‍රහණය කරන බවට ස්ථිරවම ප්‍රකාශ කරමින් ඔට්ටුවක් ඇල්ලීමට ඇය සිය ස්වාමි පුරුෂයාද එකඟ කර ගෙන තිබුණි.  ඔවුන්ගේ ඔට්ටුව මේ අයුරින් තීරණය වී තිබුණි. බිරිඳ ජයග්‍රහණය කළහොත් සැමියා බිරිඳට උණු ජලය, කෑම බීම, සාත්තු- සප්පායම් ඇතුළු දරුවන්ගේ සහ නිවසේ සියලුම කටයුතු  සතියක් ඉටුකළ යුතුය.

සැමියා ජයග්‍රහණය කළ හොත් බිරිඳ සැමියාට පෙරකී සියලු සත්කාර සමග නිවසේ සියලු කටයුතු තනිව කළ යුතුය. අවසානයේ ජනාධිපතිවරණයේ ප්‍රතිඵල නිකුත්වීමත් සමඟ බිරිඳ ජයග්‍රහණය කළ අතර සැමියා ඡන්ද ඔට්ටුව ඉටු  නොකර මගහැර සිටින්නට උත්සාහ කළේය. එහෙත්  ඡන්ද ඔට්ටුව තරයේ සිහිපත් කළ බිරිඳ මැතිවරණයෙන් සති දෙකකට පසු නිවසේ සියලු කටයුතු අතහැර සාලයේ සැප පුටුවක් මතට වී රුපවාහිනිය නැරඹීම ආරම්භ කළාය.

සැමියාට පාසල් යන දරුවන් දෙදෙනාගේ අවශ්‍යතා සොයා බලන්නට, කෑම පිසින්නට බිරිඳට ජලය  උණුකර දෙන්නට, නිවස අතුපතු ගා පිරිසුදු කිරීමටද සිදුව තිබේ.

පෞද්ගලික ආයතනයක සේවය කරන මොහු දින කිහිපයක්ම අසනීප නිවාඩු වාර්තා කර ඔට්ටුව ඉටුකළ බවට අවට හිත මිතුරන්ටද සැලවී තිබේ. ඡන්ද ඔට්ටුව නිසා සැමියා සහ බිරිඳ දින කිහිපයක්  යන තෙක් කිසිඳු වචනයක් කතා නොකර තරහකාරයන් ලෙසින් හැසිරුණු බව ගමේ අය කියති.
කැකනදුර ගයාන් දර්ශන