නෙල්සන් මැන්ඩෙලාගේ දේහය මේ වන විට ප්‍රිටෝරිය නුවර යූනියන් රාජ්‍ය ගොඩනැගිල්ලට රැගෙන ගොස් ඇති අතර එහිදි රාජ්‍ය නායකයන් ඇතුළු බොහෝ දෙනකු  මැන්ඩෙලාට අවසන් ගෞරව දැක්වීමට නියමිතය.

මැන්ඩෙලාගේ දේහය යූනියන් ගොඩනැගිල්ලේ දින තුනක් තැන්පත් කර තැබෙනු ඇත.

මැන්ඩෙලාගේ දේහය සහිත මංජුසාව රාජ්‍ය නායකන්ට ගෞරවය දැක්වීම සඳහා විවෘත කර ඇති අතර මැන්ඩෙලාගේ දේහයට ප්‍රථමයෙන්ම ගෞරව දැක්වූයේ මැන්ඩෙලාගේ පවුලේ සාමාජිකයන්ය. ඉන් අනතුරුව දකුණු අප්‍රිකා ජනපති ජාකෝබ් සූමා මැන්ඩෙලාගේ දේහයට ගෞරව දැක්වූයේය.

දේහය තැන්පත් කර තිබූ මංජුසාව දකුණු අප්‍රිකා ධජයකින් ඔතා තිබූ අතර දේහය ප්‍රිටෝරියහි යූනියන් ගොඩනැගිල්ලට රැගෙන යන මග දෙපස විශාල ජනකායක් රැස්ව සිටියහ.

 සොකර් සිටි පාපන්දු ක්‍රීඩාංගනයේ සිට ප්‍රිටෝරියා නුවරට මැන්ඩෙලාගේ දේහය රැගෙන යනු ලැබුවේ විශේෂ රථ පෙළපාලියකිනි. එම දෙපස ආරක්ෂක අංශ සාමාජිකයන් සිරුවෙන් සිට මැන්ඩෙලාගේ දේහයට ආචාර කළ බවද විදෙස් මාධ්‍ය වාර්තා කළේය.

(විදෙස් මාධ්‍ය ඇසුරෙනි)