හමාස් පාලනයට නතු පලස්තීනයේ ගාසා තීරයට පැමිණි එක්සත් ජාතීන්ගේ මහ ලේකම් බෑන් කී මූන්ගේ රිය පෙරහර පෙරේදා (2) විරෝධතාකරුවන් පිරිසකට මැදි වූ අවස්ථාවේදී කෝපයට පත්ව සිටි එම පිරිස මහ ලේකම්වරයා ගමන් කළ රියට සපත්තුවලින් දමා ගසන්නට වූහ. මහ ලේකම්වරයා ගාසා තීරයට පැමිණියේ ඊශ‍්‍රායල/පලස්තීන අර්බුදයට සාකච්ඡුා මාර්ගයෙන් විසඳුම් සේවීමේ අරමුණින්ය. මහ ලේකම්වරයාට පලස්තීන ජනතාවගෙන් විරෝධයක් එල්ල වූයේ ඊශ‍්‍රායල අත්අඩංගුවේ පසුවන පලස්තීන සිරකරුවන්ගේ පවුල්වල සාමාජිකයන් හමුවී කතාබහ කර බලන්නැයි පලස්තීන වැසියන් කළ ඉල්ලම ප‍්‍රතික්ෂේප කළ නිසාය. මාධ්‍ය වාර්තා කළේ සියයකට ආසන්න විරෝධතාකරුවන් පිරිසක් මහ ලේකම්වරයා ගමන් කළ රථ පෙළ වට කරගෙන සපත්තුවලින් දමා ගසන්න වූ බවය. සපත්තු ප‍්‍රහාරයෙන් මහ ලේකම්වරයාට හෝ ඔහු සමඟ පැමිණි එක්සත් ජාතීන්ගේ නිලධාරීන්ට හෝ අනතුරක් සිදු නොවිණි. මහ ලේකම් මූන් ඊශ‍්‍රායලයට කත් අදිනවා යැයි විරෝධතාකරුවෝ චෝදනා කරන්නට වූහ. පලස්තීන සිවිල් අයිතිවාසිකම් වෙනුවෙන් පෙනී සිටින සංවිධාන සහ ව්‍යාපාරික ප‍්‍රජාව මහලේකම් මූන් සමඟ රාතී‍්‍ර භෝජන සංග‍්‍රහයකට එක් වීමට ද නියමිතව තිබුණි. එහෙත් ඊශ‍්‍රායල බන්ධනාගාරවල සිරකර සිටින පලස්තීනුවන්ගේ පවුල්වල සාමාජිකයන් හමුවී කතා බහ කිරීම මහ ලේකම්වරයා ප‍්‍රතික්ෂේප කිරීමත් සමඟ ඔවුහු එම රාතී‍්‍ර භෝජන සංග‍්‍රහය වර්ජනය කළහ. පලස්තීනුවෝ 5,000 කට වැඩි පිරිසක් ඊශ‍්‍රායල බන්ධනාගාරවල සිරගතව සිටිති. ඔවුන්ගේ සුවදුක් බැලීමටවත් ඔවුන්ගේ පවුල්වල අයට අවසර නොලැබෙයි. මහ ලේකම් මූන් ගාසා තීරයේ සංචාරය කරන තෙවැනි අවස්ථාව වූයේ මෙයයි. මීට පෙර 2008 වසරේදී ද ඔහු ගාසා තීරයට පැමිණි විට මේ අයුරින්ම විරෝධාතාවලට මුහුණ දුන්නේය. ගාසා තීරයෙන් කඩිමුඩියේ පිටවී ගිය එක්සත් ජාතීන්ගේ මහ ලේකම්වරයාගේ ගමනාන්තය වූයේ ඊශ‍්‍රායලයයි. ඊශ‍්‍රායලයේ ඩෙරෝට් නගරයට පැමිණි ඔහුට උණුසුම් පිළිගැනීමක් හිමි වූ බව විදෙස් පුවත් සේවා වාර්තා කරයි.