තලේබාන් පාලනය පැවති සමයේ පැවති දඩුවම් ක්‍රම යළිත් හදුන්වාදීමට ඇෆ්ගනිස්ථාන රජය සැරසෙන්නේයැයි හියුමන් රයිට්ස් වොච් සංවිධානය පවසයි.

ඇෆ්ගනිස්ථානයේ දණ්ඩ නීති සංග්‍රහය සංශෝධනය කිරීමට එරට අධිකරණය කටයුතු කරමින් සිටින අතර එම සංශෝධනයන් යටතේ දුරාචාරයේ යෙදී හසුවන්නන්ට ලබා දිය යුතු දඩුවම් මැයෙන් දණ්ඩ නීති සංග්‍රහයට නව වගන්තියක් එක් කිරීමට අධිකරණය කටයුතු කර ඇතැයි සදහන්ය.

නව වගන්තිය යටතේ එවැනි පුද්ගලයින්ට ලබා දිය යුතු දඩුවම් ලෙස කස පහර දීම,ගල් ගසා මැරීම වැනි දඩුවම් දක්වා ඇතැයි හියුමන් රයිට්ස් වොච් සංවිධානය කියයි.

මෙවන් දඩුවම් ක්‍රම තලේබාන් පාලන සමයේ ඇෆ්ගනිස්ථානයේ පැවතියද බටහිර මැදහත්වීමෙන් පිහිටවුනු නව රජය මෙම ම්ලේච්ඡ දඩුවම් සියල්ල අහෝසි කිරීමට කටයුතු කර තිබුණි.

නමුත් යළිත් එවන් දඩුවම් හදුන්වාදීමට ඇෆ්ගනිස්ථානය සැරසෙන්නේ යැයි හියුමන් රයිට්ස් වොච් සංවිධානය චෝදනා කරයි.

මෙම චෝදනා වලට නිසි පිළිතුරු දීමට ඇෆ්ගනිස්ථානයේ වත්මන් ජනපති හමිීඩ් කර්සායි හට නොහැකි වුවහොත් ඇෆ්ගනිස්ථානයට බටහිර සහය අහිමිවීම නොවැළැක්විය හැකි වනු ඇතැයි විචාරකයින් කියයි.