ඉන්ධන ගැලූමකින් සැතපුම් 313 ක් ධාවනය කළ හැකි යැයි පැවසෙන නව මෝටර් රථයක් වෙළදපොළට එක් කිරීමට ජර්මනියේ වොක්ස්වාගන් සමාගම කටයුතු කර තිබේ.

වොක්ස්වාගන් එක්ස් - එල් ලෙස හැදින්වෙන මෙම මෝටර් රථය ජවගැන්වීමට විදුලි මෝටර පද්ධතියකුත් ඩීසල් එන්ජිමකුත් භාවිතා කෙරේ.රථවාහන තදබදය වැඩි නගරබද ධාවනයට විදුලි මෝටර පද්ධතියත් දිගු දුර ධාවනයට ඩීසල් එන්ජිමත් යෝග්‍ය වන්නේ යැයි වොක්ස්වාගන් සමාගම කියයි.මෝටර පද්ධතිය හා එන්ජිම අතර ධාවනය හුවමාරු කිරීමේ හැකියාවද රියදුරාට ලබා දී තිබේ.

මෙවන් කි්‍රයාකාරීත්වයකින් යුක්ත වන මෝටර රථ වෙළදපොළේ සුලභ වුවත් ඒවා මෙම මෝටර් රථයේ තරම් ඉන්ධන පිරිමැස්මක් ලබා නොදේ.

මෙම මෝටර් රථයේ ඉන්ධන පිරිමැස්ම පසුපස ඇති රහස ලෙස නිෂ්පාදකයෝ පෙන්වා දෙනුයේ එහි නිමාවයි.වායු ප්‍රතිරෝධය අවම වන සේ නිර්මානය කර ඇති සැකිල්ල නිසා මෝටර් රථය ධාවනය කිරීමට වැඩි ජවයක් අවශ්‍ය නොවන බව නිශ්පාදකයින් කියති.සම්පූර්ණයෙන්ම කාබන් ෆයිබර් නම් සැහැල්ලූ එහෙත් ඉතා ශක්තිමත් අමුද්‍රව්‍යයෙන් නිමවා ඇති මෙම මෝටර් රථයේ බර කිලෝග්රෑම් 795 කි.එයද ඉන්ධන පිරිමැස්මට හේතු වන වැදගත් සාධකයකි.

මෝටර් රථය ඉන්ධන පිරිමැස්ම මතම පිහිටුවා නිර්මානය කෙරී නොමැති බව පැහැදිලි වන්නේ එහි වේගය සැළකූ විටය.තත්පර 11 ඇතුළත පැයට සැතපුම් 60 ක වේගයක් අත්කර ගත හැකි මෙම මෝටර් රථයේ උපරිම වේගය පැයට සැතපුම් 99 කි.

මෙවන් මෝටර් රථ නිශ්පාදනය කෙරෙනු ඇත්තේ දෙලක්ෂයක් ක් පමණි.එය වොක්ස්වාගන් සමාගමේ තීරණයකි.සම්පූර්ණයෙන්ම අතින් නිර්මානය කෙරෙන මෙවන් මෝටර් රථයක වටිනාකම ඒ නිසාම සැලකිය යුතු තරමින් ඉහළය.පවුම් ලක්ෂයක පමණ මුදලකට නව මෝටර් රථය මිල කිරීමට වොක්ස්වාගන් සමාගම කටයුතු කර ඇත

ඉන්ධන පිරිමැස්ම අතින් ඉහළ වුවත් මිල අතින් වඩාත් ඉහළ නිසා මෙම මෝටර් රථය ඉන්ධන මිල පිළිබඳ සැළකිලිමත් වන බහුතර ජනතාවට යෝග්‍ය නොවන බව බහුතරයගේ අදහසයි. තාක්ෂණික දියුණුව අගය කරනවා විනා මෙම මෝටර් රථයට වෙනත් තේරුමක් නොමැති යැයි ඔවුන් පවසයි.