අධික තරබාරුභාවය, ඒ හා බැදුණු පමණ ඉක්මවා සීනි අධික ආහාර අනුභවය, නොවුමනා ලෙස මත්පැන් පානය කිරීම වර්තමානයේ පිළිකා තත්ත්වයන් ඇති වීම කෙරෙහි බලපාන නවතම ප්‍රවණතාවයන් වී ඇතැයි ලෝක සෞඛ්‍ය සංවිධාන වාර්තාවක දැක්වේ.

‘ලෝක පිළිකා වාර්තාව‘  නම් වන මෙම වාර්තාවේ තම තමන්ගේ ආහාර රටා හා ජීවන පුරුදු වෙනස් කරනොගන්නේ නම් එළැඹෙන වසර 20 කාලය අතරතුරදී ලෝක පිළිකා රෝගීන්ගේ සංඛ්‍යාව ලක්ෂ 250 කින් පමණ ඉහළ යනු ඇතැයි සදහන්ය.

වාර්තාව පිළියෙල කිරීම සදහා සිදු කළ සමීක්ෂණයන්ට අනුව වාර්තා වුනු පිළිකා තත්ත්වයන් බොහෝමයක් මුල් අවස්ථාවේම හදුනාගගෙන තිබුණේ නම් මාරාන්තික වීමට පෙර වළක්වාගත හැකිව තිබුණු තත්ත්වයේ ඒවා බව ලෝක සෞඛ්‍ය සංවිධානය කියයි.

පිළිකා අවදානම ඇති රටවල් අතුරින් ඉදිරියෙන්ම සිටින්නේ සුළු හා මධ්‍ය ආදායම් ඇති රටවල් යැයිද වාර්තාවේ දැක්වේ.

එම රටවලට පිළිකා සම්බන්ධයෙන් හරිහැටි අවබෝධයක් නොතිබීමත්, ගෝලීයකරණය හමුවේ වෙනත් රටවල සංස්කෘතීන්ගේ බලපෑම් වලට යටත්ව දුම්පානය, මත්පැන් පානය වැනි අයහපත් කි්‍රයා පමණ ඉක්මවා යෙදීමත්  මේ තත්ත්වයට හේතුවී ඇතැයි ලෝක සෞඛ්‍ය සංවිධානය පෙන්වා දේ.පිළිකා රෝගීන්ට ප්‍රතිකාර කිරීමට නිසි පහසුකම් සැපැයීමට මෙවන් බොහෝ රටවල රජයයන්ද අපොහොසත්වී තිබීම තත්ත්වය තවත් බරපතල කරන්නේයැයිද ලෝක සෞඛ්‍යය සංවිධානය කියයි.

පිළියම් ලෙස එවන් රටවල මත්පැන් හා පැණි බීම පානයන්ට බදු පැනවීමත්, පිළිකා රෝග සම්බන්ධයෙන් විවිධාකාරයේ දැනුම්වත් කිරීමේ වැඩසටහන් කි්‍රයාවට නැංවිය යුතු වීමේ වැදගත්කමත් වාර්තාවෙන් පෙන්වා ඇත.