ලොව දෙවැනි විශාලතම දියමන්තිය බොට්ස්වානා හිදී සොයාගෙන ඇතැයි එරට ලුකාරා දියමන්ති ව්‍යාපාරික ආයතනය කියයි.

කැරට් 1,111 ක් වන මෙම දියමන්තිය බොට්ස්වානාහි අගනුවර වන ගැබරෝන් සිට කිලෝමීටර් 500 ක් දුරින් පිහිටි කැරෝව් දියමන්ති පතලකින් සොයාගෙන ඇතැයි එරට පුවත් සේවා පවසයි.

මෙම දියමන්තිය බොට්ස්වානාවලින් එදා මෙදා තුර සොයාගත් විශාලතම දියමන්තිය බවත් පසුගිය සියවසෙහි සොයාගත් ලොව විශාලතම දියමන්තිය බවත් කියති.

1905 දී දකුණු අප්‍රිකාවෙන් සෙයාගත් කැරට් 3,106ක කලිනන් දියමන්තිය ලොව විශාලතම දියමන්තිය ලෙස ඉතිහාසගත වාර්තා කියයි. එය තවත් කුඩා ගල් 9කට වෙන්කැරිණි. ඒවායින් වැඩි ප්‍රමාණයක් බ්‍රිතාන්‍යයේ මැණික් ඔටුන්න සඳහා යොදාගෙන ඇත.

ලුකාරා ආයතනය පවසන්නේ කැරට් 813 ක හා කැරට් 314 ක තවත් විශේෂිත සුදු දියමන්ති දෙකක් එම පතලින්ම සොයාගත් බවයි.

මෙහි මිල තීරණය කිරීම ලේසිපහසු කාර්යයක් නොවනු ඇතැයි පාරිබෝගික භාණ්ඩ හා පතල් කැණීම් විශ්ලේෂක කිරන් හොග්සන් ඒඑෆ්පී පුවත් සේවයට පවසා ඇත. පසුගිය අප්‍රේල් මාසයේදී ඇමරිකාවේ නිව්යෝක් නුවරදී කැරට් 100 ක දියමන්තියක් ඩොලර් මිලියන 22.1 කට (ශ්‍රී ලංකා රුපියල් මිලියන 3143.39 ) ක මුදලකට විකිණූ බව විදෙස් පුවත් සේවා කියයි.

බොට්ස්වානා රාජ්‍යය ලොව විශාලතම දියමන්ති නිෂ්පාදන හා සැපයුම් වෙළඳපළක් හිමි රටකි.