ඇමෙරිකාවෙන් ගුවන් ප‍්‍රහාරයක් එල්ලවේවියැයි බියෙන්, ඉරානය මින් ඉදිරියට ඔවුන්ගේ න්‍යෂ්ටික කටයුතු කඳුකරයේ පිහිටි භූගත බංකරයක සිදුකිරීමට බලාපොරොත්තු වන බව වාර්තාවේ. ඒ සඳහා ෂියා මුස්ලිම්වරුන්ගේ ශුද්ධ නගරයක් ලෙස සැලකෙන කොම් නගරය අසල පිහිටි කඳුකරය තෝරා ගෙන ඇති බව ද ඉරාන රජය පවසයි. රුසියාවේ ද සහාය ඇතිව ඉරානය සිය න්‍යෂ්ටික වැඩසටහන ආරම්භ කළේ රටේ බලශක්ති අර්බුදයට විසඳුම් සෙවීමේ අරමුණ ඇතිවය. ඇමෙරිකාව ප‍්‍රමුඛ බටහිර රටවල් ගණනාවක් පවසන්නේ ඉරානය ඔවුන්ගේ න්‍යෂ්ටික වැඩසටහනට මුවා වී පරමාණු බෝම්බ නිපදවන බවය. එහෙත් ඉරානය එම චෝදනා තරයේ ප‍්‍රතික්ෂේප කරයි. එක්සත් ජාතීන්ගේ පරමාණු ශක්ති අධිකාරිය පසුගියදා එළිදැක්වූ වාර්තාවක ද සඳහන්ව ඇත්තේ ඉරානය හොර රහසේ න්‍යෂ්ටික අවි නිපදවන බවට තොරතුරු අනාවරණය වී ඇති බවය. පසුගියදා ඇමෙරිකා හමුදාවේ ඔත්තු බලන නියමුවන් රහිත ඩ්‍රෝන යානයක් ඉරාන හමුදාව අතට පත්විය. එම යානය ආපසු දෙන්නැයි ඇමෙරිකා රජය ඉල්ලීමක් කළ ද ඉරානය එය ප‍්‍රතික්ෂේප කළේය. ඉරානය පවසන්නේ තමන්ගේ න්‍යෂ්ටික බලාගාර ගැන ඔත්තු බැලීමට ඇමෙරිකාව එම යානය එවූ බවය. කිසිදු හානියක් නොවී යානය ඉරාන හමුදාව අතට පත්වූයේ කෙසේ ද යන්න ඇමෙරිකාවට ලොකු ප‍්‍රශ්නයක් වී ඇත.