ඇමෙරිකා ජනාධිපති ඩොනල්ඩ් ට්‍රම්ප් සහ ‘නේටෝ’ මහ ලේකම් මාක් රූට් අතරේ හමුවක් වාෂින්ටන් අගනුවර ධවල මන්දිරයේ දී පැවැත්විණි. එම හමුවේදී, මාධ්‍යවේදීන් ග්‍රීන්ලන්තය සම්බන්ධයෙන් ප්‍රශ්න කළ අතර, එහිදී ග්‍රීන්ගන්තය ඇමෙරිකාවේ ජාතික ආරක්ෂාවටත්, ලෝකයේ ආරක්ෂාවටත් අවශ්‍ය බව පැවැසීය. ග්‍රීන්ලන්තය මිලදී ගැනීමේ අදහස කිසිසේත් බැහැර කර නැතැයි ට්‍රම්ප් අවධාරණය කළේය.

‘නේටෝ’ හෙවත් උතුරු අත්ලාන්තික් ගිවිසුම් සංවිධානයේ මහ ලේකම්, මාර්ක් රූට්, ට්‍රම්ප් හමුවීමට ධවල මන්දිරයට පැමිණියේ, රුසියන් යුක්රේන යුද්ධය ගැනත්, ට්‍රම්ප් සහ ‘නේටෝ’ සංවිධානය අතරේ පවතින මත ගැටුම් සම්බන්ධයෙන් සාකච්ඡා පැවැත්වීමටය. ‘නේටෝ’ යනු ඇමෙරිකාව, කැනඩාව සහ යුරෝපා බටහිර රටවල් එක්වී, රුසියාවට එරෙහිව පිහිටුවාගත් යුද සන්ධානයයි.

ග්‍රීන්ලන්තය ස්වයං පාලන ප්‍රදේශයක් වුවත්, එහි අයිතිය ඇත්තේ ඩෙන්මාර්කයටය. ග්‍රීන්ලන්තය ඇමෙරිකාවට පවරා ගැනීම සම්බන්ධයෙන් තමන් කිසිදු අදහසක් පළ නොකරන නමුත්, ට්‍රම්ප් පවසන ආකාරයට ග්‍රීන්ලන්තය ඇමෙරිකාවේ ජාතික ආරක්ෂාවට පමණක් නොව ලෝකයේ ආරක්ෂාවට අත්‍යාවශ්‍ය යැයි නේටෝ මහ ලේකම්වරයා අවධාරණය කළේය.

(අල් අසීරා)