ජපානයේ නිල සංචාරයක යෙදෙන ඇමෙරිකන් ජනාධිපති ඩොනල්ඩ් ට්‍රම්ප්, එරට නව අග්‍රාමාත්‍යවරිය වන සනෙයි ටකයිචී හමුවිය. ටකයිචී, අග්‍රාමාත්‍ය ධුරයට පත්වීමෙන් පසු, ඇය හමුවුණු පළමු රාජ්‍ය නායකයා වන්නේ ඇමෙරිකන් ජනාධිපතිවරයා වීම විශේෂත්වයකි.

ටකයිචී, ජපානයේ හිටපු අග්‍රාමාත්‍යවරයකු වන ෂෙන්සෝ අබේගේ දේශපාලන දැක්මෙන් පන්නරය ලැබූ දේශපාලඥයෙකි. අබේ, ඇමෙරිකන් ජනාධිපතිගේ ඉතා සමීප මිතු රෙකි. අබේ ඝාතනයට ලක්වූයේ 2022 වසරේදීය. අබේ සහ තමන් අතර පැවැති මිත්‍රත්වය, ටකයිචී, හරහා තවත් ශක්තිමත් වූ බවත්, ජපානයට අවශ්‍ය ඕනෑම ආකාරයේ සහායක් ලබා දීමට තමන් සූදානම් බවත්, ට්‍රම්ප් පවසා ඇත.

ඊට අමතරව, ජපානය සමඟ වෙළෙඳ ගනුදෙනු පුළුල් කරමින්, ජපානයට පනවා ඇති තීරු බදු අඩු කිරීම සම්බන්ධයෙන් ද සාකච්ඡා පැවැත්විණි. ජපන් අග්‍රාමාත්‍යවරිය හමුවී අතට අත දීමෙන් පසු ට්‍රම්ප් මාධ්‍ය හමුවේ කියා සිටියේ පළමු හමුවේදීම ඇය සැබෑ නායිකාවක ලෙස තමන්ගේ සිත් දිනා ගත් බවය.