බටහිර බෙංගාලයේ, කල්කටා නුවර, වෛද්‍ය විද්‍යාලයක ඉගෙනුම ලබමින් සිටි වෛද්‍ය සිසුවියක දූෂණය කර, ඝාතනය කිරීමේ සිද්ධිය මුල්කොට ගනිමින්, ආරම්භ කළ විරෝධතාවට, ඉන්දීය වෛද්‍යවරු ලක්ෂ 3 කට වැඩි පිරිසක් එක් වී සිටිති.

ඉන්දීය මාධ්‍ය වාර්තා කළේ නේවාසික වෛද්‍යවරුන්ගේ සංගමය ද විරෝධයට සහාය පළ කිරීමට ඉදිරිපත් වුණු බවය. දීපව්‍යාප්තව විරෝධතා පැවැත්වුවත්, ප්‍රධාන විරෝධතා පැවැත්වෙන්නේ, කොල්කටා නුවරය.

දූෂණයට ලක් කර ඝාතනය කෙරුණේ, කොල්කටා නගරයේ රජයේ ‘ආර්.ජී. කාර්’ වෛද්‍ය විද්‍යාලයේ අධ්‍යාපනය ලබමින් සිටි 31 හැවිරිදි සිසුවියකි. ඇගේ සිරුර හමුවූයේ වෛද්‍ය විද්‍යාලයට අයත් ගොඩනැගිල්ලක් තුළදීය. තරුණියගේ මරණ පරීක්ෂණයෙන් අනාවරණය වූයේ ඇය ඝාතනය වීමට පෙර අතවරයට ලක් වුණු බවය.

සිද්ධිය සම්බන්ධයෙන් පොලිස් විමර්ශන දිගටම පැවැත්වෙන අතර එක් සැකකරුවකු පොලිස් අත්අඩංගුවේ පසුවන බව පැවැසෙයි.

(එන්.ඩී.ටීවී.)