‘ජී20’ රාජ්‍ය නායක සමුළුව දකුණු අප්‍රිකාවේ ජොහැන්නස්බර්ග් නුවරදී පැවැත්වුණු අතර, ඊට ඇමෙරිකාව සහභාගී වූයේ නැත. ඇමෙරිකන් ජනාධිපති ඩොනල්ඩ් ට්‍රම්ප් හෝ ඇමෙරිකාව නියෝජය කරමින් කිසිදු නියෝජිතයකු සමුළුවට සහභාගී නොවූයේ ඇමෙරිකාව සමුළුව වර්ජනය කළ බැවිනි.

‘ජී20’ යනු ලෝකයේ ප්‍රබලමත ආර්ථිකයන්ට හිමිකම් කියන රටවල් විස්සේ එකමුතුවය. ඊට අමතරව යුරෝපා සංගමය පමණක් නොව, අප්‍රිකා සංගමය ද ‘ජී20’ කණ්ඩායමට ඇතුළත් වෙයි. ජාත්‍යන්තර සහයෝගීතාවක් ඇති කර ගැනීම මෙම සමුළුවේ අරමහුණ වෙයි.

ඇමෙරිකාව මෙවර ‘ජී20’ සමුළුව වර්ජනය කළේ, ඇමෙරිකන් ජනාධිපති ඩොනල්ඩ් ට්‍රම්ප් රජය සහ දකුණු අප්‍රිකා ජනාධිපති සිරිල් රමපෝසාගේ රජය අතරේ පවතින මත ගැටුම් නිසාය. මෙම මත ගැටුම්වලට හේතුව වී ඇත්තේ දකුණු අප්‍රිකා රජය, එරට සුළුතරය ලෙස සැලකෙන සුදු ජාතිකයන්ගේ ඉඩම් බලහත්කාරයෙන් අත්පත් කර ගන්නවා යන චෝදනාය.

කළු ජාතිකයන්, සුදු ජාතිකයන් අමානුෂික ලෙස ඝාතනය කරමින් ඉඩම් අත්පත් කර ගන්නා බවට ද චෝදනා එල්ල වී ඇත. මෙය දකුණු අප්‍රිකා ජනාධිපති රමපෝසා තරයේ ප්‍රතික්ෂේප කරයි.

ඇමෙරිකාව සමුළුවට සහභාගී නොවුණත්, සෙසු ‘ජී20’ සාමාජික රටවල රාජ්‍ය නායකයෝ සමුළුවට සහභාගී වූහ. ඒ අතර ඉන්දීය අග්‍රාමාත්‍ය නරේන්ද්‍ර මෝදි සහ බ්‍රසීල ජනාධිපති ලූලා ද සිල්වා ද විය. ‘ජී20’ රාජ්‍ය නායක සමුළුවක් අප්‍රිකාවේ පැවැත්වුණු පළමු අවස්ථාව මෙයයි. 2026 වසරේ ‘ජී20’ සමුළුව ඇමෙරිකාවේ පැවැත්වීමට නියමිතය.

ඇමෙරිකාව ‘ජී20’ සමුළුව, වර්ජනය කිරීම සම්බන්ධයෙන් දකුණු අප්‍රිතකා ජනාධිපති රමපෝසා සියට අප්‍රසාදය පළ කර ඇති අතර එය ට්‍රම්ප්ගේත්, ට්‍රම්ප් පරිපාලනයේත් දැඩි විරෝධයට හේතුවක් වී ඇත.

ලබන 2026 වසරේ ‘ජී20’ සමුළුව නිල වශයෙන් පැවැත්වීම තමන් බාර ගන්නා බව සංකේතවත් කිරීමට පමණක්, දකුණු අප්‍රිකාවේ ඇමෙරිකන් තානාපති සමුළුවට සහභාගී වුණු බව ද පැවැසීය.