(ඩයනා උදයංගනී )

රටේ පැවති තත්ත්වය සළකා නව අගමැතිවරයකු  පත්කිරීමට ජනාධිපතිවරයා ගත් තීරණය අනුමත කරන බවත්,ස්වාධින මන්ත්‍රීවරයකු ලෙස  විපක්ෂයේ සිටිමින් නව රජයට සහය දෙන බවත් එක්සත් ජාතික පෙරමුණු ජාතික ලැයිස්තු පාර්ලිමේන්තු මන්ත්‍රී අතුරලියේ රතන හිමියෝ පැවසූහ.


එමෙන්ම තමන්ට හිමි බලතල අනුව වහාම පාර්ලිමේන්තුව විසුරුවන ලෙස ජනාධිපතිවරයාගෙන් ඉල්ලා සිටින බවද උන්වහන්සේ කීහ.

ජනතාව බලාපොරොත්තු වූ වෙනස ඇති කිරීමට පැවති ජාතික රජය කටයුතු නොකළ බව කී රතන හිමියෝ ඒ හේතුවෙන් රට ආර්ථික වශයෙන් මෙන්ම බොහෝ අංශයන්ගෙන් පිරිහුණු බව සදහන් කළහ.

රටේ ඒකීය භාවයට හානිවන හා බුදු දහමට හිමි ස්ථානය අහිමි වන ආකාරයේ යෝජනා සහිත ආණ්ඩුක්‍රම ව්‍යවස්ථා යෝජනාවක් පාර්ලිමේන්තුවට ඉදිරිපත් කිරීම පැවති රජයට තිබූ ජනමතය වෙනස් වීමට හේතු වූ බවද උන්වහන්සේ කීහ.


ජාතික සම්පත් විකුණමින් කටයුතු කළ පැවති රජයේ ක්‍රියා කලාපය කිසිසේත් අනුමත කළ නොහැකි බව රතන හිමියෝ ප්‍රකාශ කළහ.

එම කරුණු සළකා ජනාධිපතිවරයා ගත් තීරණය ව්‍යවස්ථානුකූල හා නීත්‍යානුකූල බවද  උන්වහන්සේ කීහ. උන්වහන්සේ මේ බව පැවසුවේ රාජගිරිය ගෝතමී පාරේ පිහිටි සදහම් සෙවණේ දී අද පැවති මාධ්‍ය හමුවක් අමතමිනි.

(ඡායාරූප හා විඩීයෝ දසුන් - ශාන්ත රත්නායක)