(රෝෂන් තුෂාර)

කොටස් වෙළඳපොලේ මුදල් ආයෝජනය කර ප්‍රතිලාභ ලබා දෙන බවට අඟවන ව්‍යාජ පෝස්ට් මුහුණු පොත ඇතුළු සමාජ මාධ්‍ය ඔස්සේ  උඩුගත කර මුදල් වංචා කිරීමට තැත් කළ සැකකරුවන් වහා අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම මහතා රහස් පොලිසියට නියෝග කළේය.

අදාළ සැකකරුවන්ගේ සමාජ මාධ්‍ය ගිණුම් සම්බන්ධයෙන් වාර්තාවක් ඉදිරිපත් කරන ලෙසට මෙටා (ෆෙස්බුක්) සමාගමට නියෝගයක් ද නිකුත් කළේය.

මුහුණු පොත පෙන්වා කොටස් වෙළඳපොළ ආයෝජකයන්ගේ මුදල් වංචා කිරීමට තැත් කිරීම සම්බන්ධයෙන් විමර්ශනයක් ආරම්භ කළ බවට අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන ඒකකය අධිකරණයට ඉදිරිපත් කළ කරුණු සලකා බැලීමෙන් පසුව මෙම නියෝගය නිකුත් කළේය.

රහස් පොලිසිය අධිකරණයට කරුණු දක්වමින් කියා සිටියේ කොටස් වෙළඳපොළ මඟින් ඉදිරිපත් කරන ලද පැමිණිල්ලක් අනුව මෙම විමර්ශනය ආරම්භ කළ බවය.

රහස් පොලීසිය මෙසේද පැවසීය.

කොටස් වෙළඳපොලේ ආයෝජනය කිරීමෙන් ප්‍රතිලාභ ලබාගත හැකි බවට ෆේස්බුක් මගින් ප්‍රචාරයන් සිදුවන බවට අනාවරණය කරගෙන ඇති කොටස් වෙළඳපළ බලධාරීන් එම ප්‍රචාරයන් සිදු කරන්නේ ප්‍රාථමික ගැනුම්කාර සමාගම් හෝ කොටස් වෙළඳ පලට සම්බන්ධ  නීත්‍යානුකූල සමාගම් නොවන කණ්ඩායමක් බවට  නිරීක්‍ෂණය කර ඇත.

ඒ අනුව කොටස් වෙළඳපල බලධාරීන් විසින් අදාළ සමාජ මාධ්‍යවල පළවන ප්‍රචාර අනුව  ඒවායේ ආයෝජනයන් සිදු කර ඇති අතර මෙසේ මුදල් භාර භාරගත් පුද්ගලයින්ගේ තොරතුරුද සමග රහස් පොලිසියට පැමිණිල්ලක් ඉදිරිපත් කර ඇත.

වංචනික ලෙස මුදල් ලබාගත් පුද්ගලයින් අනාවරණය කර ගැනීම සඳහා අදාළ නියෝග නිකුත් කරන ලෙසද රහස් පොලිසිය ඉල්ලා සිටියේය.

ඉදිරිපත් කළ සලකා බැලූ  ප්‍රධාන මහේස්ත්‍රාත්වරයා සමාජ මාධ්‍ය ගිණුම් අනාවරණය කර ගැනීමට නියෝග නිකුත් කරමින් සැකකරුවන් වෙතොත් වහා අත්අඩංගුවට ගෙන අධිකරණයට ඉදිරිපත් කරන ලෙසට නියෝග කළේය.