ගුණසිංහ හේරත්

ජනවාරි පළමුවැනිදා සිට සියයට 18ක් දක්වා ඉහළ යන වැට් බද්ද 2024 වසර මැදදී සියයට 21 සිට 24 අතර මට්ටමකට ඉහළ යන පෙර නිමිති 2024 අයවැය යෝජනා තුළම අන්තර්ගත වන බව පේරාදෙණිය විශ්වවිද්‍යාලයේ ආර්ථික විද්‍යා සහ සංඛ්‍යාත විද්‍යා මහාචාර්ය ආනන්ද ජයවික්‍රම හෙළිකරයි. 

මහාචාර්යවරයා සඳහන් කරන ආකාරයට 2024 දී සියයට 18ක අනුපාතයක් යටතේ වැට් බද්දෙන් රුපියල් බිලියන 1,400ක් රැස්කර ගැනීමට ආණ්ඩුව බලාපොරොත්තු වෙයි.
සියයට 18ක අනුපාතයක් යටතේ රුපියල් බිලියන 1,400ක් රැස්කර ගැනීමට නම් වැට් බදු පදනම රුපියල් බිලියන 7,778ක් දක්වා වැඩිවිය යුතුය. 2023 ට සා​පේක්ෂව එය සියයට 70ක වර්ධනයකි.

2024 දී ලංකාවේ දළ ජාතික නිෂ්පාදනයේ නාමික අගය වැඩි වන්නේ සියයට 11.4කින් බව පෙන්වා දෙන මහාචාර්යවරයා දළ ජාතික නිෂ්පාදනය සියයට 11.4කින් වැඩි වෙද්දී වැට් බදු පදම සියයට 70කින් වැඩි නොවන බවද පෙන්වා දෙයි.

දළ ජාතික නිෂ්පාදිතය වැඩිවීමට සමානුපාතිකව වැට් බදු ආදායම ද වැඩිවන බව පෙන්වාදෙන මහාචාර්යවරයා 2024 දී වැට් බදු පදනම උපරිමයෙන් වැඩි වන්නේ රුපියල් බිලියන 5,102 ක් දක්වා බවද හෙළිකරයි. ඒ රුපියල් බිලියන 5,102 යටතේ සියයට 18කින් වැට් බදු අය කළහොත් ආණ්ඩුවට උපයා ගැනීමට හැකිවන වැට් බදු ආදායම රුපියල් බිලියන 1,400ක් නොව 918ක් බවද මහාචාර්ය ජයවික්‍රම හෙළි කරයි.

ඒ අනුව ඉතිරි බිලියන 482 උපයා ගැනීම සඳහා 2024 වසර මැදදී පමණ වැට් බදු අනුපාතය සියයට 18සිට සියයට 21 හා 24 අතර මට්ටමකට ඉහළ නැංවීමට සිදුවන බව මහාචාර්ය ජයවික්‍රම පෙන්වා දෙයි.