නිමන්ති රණසිංහ

විදුලිය ගාස්තු ඉහළ දැමීම සඳහා ලංකා විදුලියබල මණ්ඩලය මහජන උපයෝගිතා කොමිෂන් සභාවෙන් කළ ඉල්ලීම සලකා බැලීමට නියමිත බව මහජන උපයෝගිතා කොමිෂන් සභාවේ සභාපති මහාචාර්ය මංජුල ප්‍රනාන්දු මහතා සඳහන් කළේය. 

මේ වසරේ ජල විදුලිය නිෂ්පාදනය අපේක්ෂිත ඉලක්ක සම්පූර්ණ නොකළ හෙයින් විදුලිය නිෂ්පාදනයට අතිරේක පිරිවැයක් දැරීමට සිදුවූ බවත්, මෙය පියවා ගැනීම සඳහා විදුලිය ගාස්තු වැඩි කිරීමේ ඉල්ලීම සිදු කළ බවත් විදුලියබල මණ්ඩලයේ සාමාන්‍යාධිකාරී ආචාර්ය නරේන්ද්‍ර සිල්වා මහතා අප කළ විමසීමකදී පැවසීය.

ගාස්තු සංශෝධන ක්‍රමවේදය අනුව ජනවාරි මාසයේදී සිදුවීමට නියමිතව ඇති විදුලිය ගාස්තු  සංශෝධනය ඔක්තෝබර් මාසයේ කිරීමට අවසර දෙන ලෙසට මේ අනුව ඉල්ලීම් කළ බවද ඔහු සඳහන් කළේය.

මේ පිළිබඳ සවිස්තරාත්මක දත්ත මහජන උපයෝගීතා කොමිෂන් සභාවට අනිද්දා (2) ලබාදීමට විදුලියබල මණ්ඩලය තීරණය කර ඇත. 
මේ අතර විදුලිය මිල වැඩි කිරීම සඳහා විදුලිය බල මණ්ඩලය කර ඇති මෙම ඉල්ලීම කැබිනට් මණ්ඩල රැස්වීමේදී ද පසුගියදා දීර්ඝව සාකච්ඡා කර ඇතැයි වාර්තා වේ.
විදුලිය නිෂ්පාදනයට අතිරේකව වැයවූ පිරිවැය හේතුවෙන් රුපියල් කෝටි 5400ක් උපයා ගැනීමට සිදුවෙන හෙයින් විදුලිය බිල වැඩි කිරීමට විදුලියබල මණ්ඩලය මහජන උපයෝගීතා කොමිෂන් සභාවෙන් මීට පෙරද  ඉල්ලීම් කළත් ඊට අවසර ලැබුණේ නැත.