ඉන්දික හේවාවිතාරණ
මේ දිනවල සවස් කාලයේදී ඇතිවන වැසි සමග අකුණු ඇතිවිය හැකි නිසා අකුණු අනතුරු වළක්වා ගැනීමට කටයුතු කරන ලෙස කාලගුණ විද්‍යා දෙපාර්තමේන්තුව ජනතාවගෙන් 
ඉල්ලා සිටියි.

මේ වන විට අන්තර් මෝසම්  තත්ත්වය ඇති වී තිබෙන බවත් මේ නිසා සවස් කාලයේදී  ඉදිරි දින කිහිපය පුරාම ගිගුරුම් සහිත වැසි ඇති විය හැකි බවද එම දෙපාර්තමේන්තුව පෙන්වා දෙයි. අදාළ උපදෙස් මෙසේය. 
අකුණු ගැසීම් සිදුවන අවස්ථාවල එළිමහනේ හෝ ගස් යට වැනි විවෘත ස්ථානවල රැඳී නොසිටිය යුතුය. ආරක්ෂිත ගොඩනැගිල්ලක් තුළ හෝ  සංවෘත වාහනයක් තුළ රැඳී සිටිය යුතුය.
අකුණු ඇතිවන අවස්ථාවෙහිදී ජලමූලාශ්‍රවල දිය නෑම, එළිමහනේ ක්‍රීඩා කිරීම, විවෘත වාහන භාවිත කිරීම සිදුනොකළ යුතුය. නිවෙස්වල විදුලි පරිපථ විසන්ධි කිරීම සුදුසුය. තද සුළං හේතුවෙන් ගස් හෝ  විදුලි රැහැන් බිම ඇද වැටීම සිදුවිය හැකි නිසා  ඒ පිළිබඳව  සැලකිලිමත් විය යුතුය. අකුණු අනතුරු නිසා මේ වසරේ ගෙවීගිය කාලයෙහිදී පුද්ගල මරණ  හයක් සිදුවී පුද්ගලයන් දෙදෙනෙකු තුවාල ලබා තිබෙන බව ආපදා කළමනාකරණ මධ්‍යස්ථානය සඳහන් කරයි.
පසුගිය වසරෙහි දී  අකුණු අනතුරු නිසා පුද්ගල මරණ දහසයක්  සිදුවී පුද්ගලයන් නවයක් තුවාල ලබා තිබේ. සවස් කාලයේදී වැසි සමග අකුණු ඇති විය හැකි නිසා අකුණු අනතුරු වළක්වා ගැනීමට කටයුතු කරන ලෙස ආපදා කළමනාකරණ මධ්‍යස්ථානය ජනතාවගෙන් ඉල්ලා සිටියි.