නිමල කොඩිතුවක්කු
 
ජාත්‍යන්තරය විසින් මිලදී ගනු ලබන මෙරට ජාතික සම්පත් තමන් බලයට පත්වූ පසු යලි ලබා ගන්නා බවට පවසන  මහින්ද රාජපක්ෂ මහතා එදා බලයේ සිටියදී යුද්ධ හමුදා මූලස්ථානය විදේශ රටකට හෝටලයක් සඳහා විකුණූ  බව පරිසර නියෝජ්‍ය අමාත්‍ය අජිත් මාන්නප්පෙරුම මහතා කොළඹදී  අද(03) පැවසීය.
 
බලයේ සිටියදි එළෙස කටයුතු කළ මහින්ද රාජපක්ෂ මහතා අද රණවිරුවන් වෙනුවෙන් කිඹුල් කඳුලූ හෙළන බවද නියෝජ්‍ය අමාත්‍යවරයා සඳහන් කළේය.
 
පිටකෝට්ටේ පිහිටි සිරිකොත එක්සත් ජාතික පක්ෂ මූලස්ථානයේ පැවති මාධ්‍ය  හමුවකට එක්වෙමින් ඒ මහතා මේ බව පැවසීය.
 
මාධ්‍ය හමුවේ අදහස් දැක්වූ පරිසර නියෝජ්‍ය අමාත්‍ය අජිත් මාන්නප්පෙරුම මහතා වැඩිදුරටත් මෙසේද කීවේය.
    
 ‘‘ඒකාබද්ධ විපක්ෂය අපේ රජයට එරෙහිව සංවිධානය කළ රැලියේ තේමා පාටය වෙලා තිබුනේ ‘‘රට වනසන රට පාවාදෙන  වැඩබැරි පරගතු ආණ්ඩුව පලවා හරිමු’’ යන්නයි. ඒ අය ඔය කියන  ආණ්ඩුව 2015 ජනවාරි 08 වැනිදා මේ රටේ ජනතාව පළවා හැරියා. අපි ඒ අයට කියනවා ආයි ඒ වෙනුවෙන් පෙළගැහෙන්න දෙයක් නැහැ අපි ඒක පලවා හැරලා ඉවරයි.
 
මේ අය අද අපිට වැඩ බෑ කියනවා. අපිට  මෙයලා කරපු සමහර වැඩ බෑ තමයි. අපේ  නායකයන්ගේ දරුවො ගිහින්  දළදා මාලිගාව ඉස්සරහා කාර් රේස් පැද්දේ නැහැ. අපි බන්ධනාගාරයට පැනලා හිර කාරයෝ මැරුවේ නැහැ.  අපිට විරුද්දව ලියනවා කියලා අපි මාධ්‍ය වේදින්ව මැරුවේ නැහැ. මාධ්‍ය ආයතන ගිනි තිබ්බේ නැහැ. සුදු වෑන් දාලා විරුද්ධ වාදින් ඉස්සුවේ නැහැ. වතුර ඉල්ලපු මිනිස්සුන්ට අපි වෙඩි තිබ්බේ නැහැ. අපිට ඒවා බැහැ තමයි. අපි ඒ අතින් අසමත් තමයි කියලා ඒ අයට කියනවා.
 
අපි රජයේ වෛද්‍ය නිළධාරීන්ගේ සංගමයට කියනවා රාජපක්ෂලාත් එක්ක තියෙන ගිවිසුම වහාම රටට හෙලි කරන්න කියලා. මහින්ද රාජපක්ෂලා කලින් දවසේ උද්ඝෝෂණ විරෝධතා  සිදුකරනවා. පහුවදා වෛද්‍ය සංගමය වැඩ වර්ජනයක් කරනවා. මේ අය අද මැච් එක ගහන්නේ කතා කරගෙනයි.‘‘

ඡායාරූප  - චතුර එස් .කොඩිකාර