හිරාන් ප්‍රියංකර ජයසිංහ
 
‘මගෙන් යම් වැරද්දක් වුණා. නමුත් කිසිම දවසක ඒ ගුරුවරිය කියලා නෑ නැවත ආනන්ද රවලාවත් බැලුවා කියලා.  ඒකනේ විය යුත්තේ. වැරදි කරපු අය වැරදි හදාගෙන නැවත සමාජය ඉදිරියට එන්න ඕනෑ.‘ යැයි ආණමඩුව ශ්‍රි ලංකා නිදහස් පක්ෂ නව සංවිධායක ආනන්ද සරත් කුමාර මහතා පැවසිය.
 
ආනන්ද සරත් කුමාර මහතා මේ බව පැවසුවේ ඔහු  පිළිගැනිම වෙනුවෙන් සංවිධානය කර තිබූ    රැස්විමකට එක්වෙමිනි. මෙම අවස්ථාවට ප්‍රධාන ආරාධිතයා ලෙස ක්‍රීඩා අමාත්‍ය දයාසිරි ජයසේකර මහතා ද එක්ව සිටි අතර හිටපු කැබිනට් ඇමතිවරයකු වන මිල්රෝයි ප්‍රනාන්දු, නියෝජ්‍ය ඇමතිවරයකු වන වික්ටර් ඇන්ටනී යන මහත්වරුන් හා 2000 කට ආසන්න ජනතාවක් පිළිගැනිමට එක්ව සිටියහ.  
 
‘‘සංවිධායක තනතුර භාර අරන් සති දෙකක් බලන් හිටියා ඕනා කෙනෙකුට ඕනාම දෙයක් කියන්න මඩ ගහන්න ඉඩ දීලා. ඊට පස්සෙයි මම අද මේ පිළිගැනීමට එක්වු‍ණේ . දිගට හරහට මඩ ගහන්න මම ඉඩ දීලා හිටියා. නමුත් වරදක් වුන පළියට   එළව එළවා පහර දිම කුමන දෙයක් දැයි මට වැටහෙන්නේ නෑ. 
කරපු වරද සමත මණ්ඩලෙන් බේරගන්න පුළුවන් තරමේ එකක්. නමුත් පොලිස් අත් අඩංගුවට අරං අධිකරණයට ඉදිරිපත් කරලා ඉන් පස්සේ මහ අධිකරණයට දාලා වරදකරු කරලා දඩ ගැහුවා .  තවත් මොන දඬුවමක්ද? හැබැයි මම මට ජන්දේ දුන්න ජනතාවට ආචාර කරලා බොහෝම ගෞරව ලෙස මන්ත්‍රි ධුරයෙන් ඉල්ලා අස්වුණා.  
 
 දේශපාලනයට මම අමුත්තෙක් නොවේයි . කිසි කෙනෙකු ජන්දය ඉල්ලන් සුදානම් නැති කාලයක මම ජන්දෙට ආවේ . ඒ තරමට රටේ භීෂණය තිබුන කාලයක් . සිරිමා බණ්ඩාරනායක මැතිනියගේ කාලයේ ඉඳලා තමයි ආණමඩුව සංවිධායක ධුරය ඉල්ලා සිටියේ. නමුත් ලැබුනේ නැහැ. මම  පණ වාගේ ආදරය කරපු අදටත් ආදරය කරන මහින්ද රාජපක්ෂ මහත්තයාත් දුන්නේ නැහැ. නමුත් මහ මැතිවර්ණයේදි මහින්ද මහත්තයාට වැඩ කරලා වේදිකාවල මෛත්‍රිපාල සිරිසේන මහත්තයාට මම බැණපු විදිහට මම හිතුවේ නැහැ කවදාවත් එතුමා අතින් මට ආණමඩුව සංවිධායක කම ලබා දෙයි කියලා. 
 
 ආණමඩුව ජනතාව හැමදාම ඉල්ලා සිටියේ ආණමඩුවේ එකෙක් .දැන් ජනතාවට ඒ සදහා අවස්ථාව තියෙනවා ජනතාව මා ගැන හොදින් දන්නවා .  ‘‘