සමස්ත රාජ්‍ය සේවකයන් ඉදිරි වසර කිහිපය තුළදී සංවර්ධනයේ නියමුවන් බවට පත්වෙමින් එහි නියාමනයට උරදිය යුතු බව ජනාධිපති මෛත‍්‍රීපාල සිරිසේන මහතා පෙරේදා (12) පැවසීය.

රටේ සංවර්ධන වැඩපිළිවෙළට උරදීම සියලූ රාජ්‍ය සේවකයන්ගේ වගකීම බව කී ජනාධිපතිවරයා එම සංවර්ධන වැඩපිළිවෙළ මෙහෙයවීමේ කේන්ද්‍රස්ථානය වන්නේ ජනාධිපති කාර්යාලය බැවින් ජනාධිපති කාර්යාලය ඵලදායීතාවෙන් සහ සඵලතාවෙන් ඉහළ ආයතනයක් බවට පත් කළ යුතු බව ද සඳහන් කළේය.

ඒ සඳහා එහි කාර්ය මණ්ඩලය සූදානම් කිරීමේ අරමුණින් පැවති හමුවක් අමතමින් ජනාධිපති මෛත‍්‍රීපාල සිරිසේන මහතා මේ බව පැවසීය.

කොළඹ නෙළුම් පොකුණ රඟහලේ දී පෙරේදා (12) පස්වරුවේ මෙම හමුව පැවැත්විණි.

ලක්ෂ 14 ක් වන සමස්ත රාජ්‍ය සේවයට ආදර්ශයක් වෙමින් ජනාධිපති කාර්යාලයේ කටයුතු නව මුහුණුවරකින් සහ නව වැඩපිළිවෙළක් ඔස්සේ කාර්යක්ෂමව සහ සැලසුම්සහගත අයුරින් ඉදිරියට පවත්වාගෙන යාමේ වැදගත්කම ජනාධිපතිවරයා මෙහිදී පෙන්වා දුන්නේය.

රාජ්‍ය නිලධාරීන්ට මඟපෙන්වීම තිබෙන්නේ රාජ්‍යය කරන්නා වූ දේශපාලන නායකත්වයේ මෙහෙයවීම, කළමනාකරණය සහ පරිපාලනයේ සාර්ථකත්වය මත බව පැවසූ ජනාධිපතිවරයා රාජ්‍ය සේවයේ කිසිවකුට තමා චෝදනා නොකරන අතර යම් ගැටලූකාරී තත්ත්වයක් මතුව තිබෙන්නේ නම් ඊට වගකිවයුත්තේ දේශපාලන අධිකාරිය බව ද කියා සිටියේය.

ලබන මාසයේ සිට තමන් සෑම අමාත්‍යාංශයකම ප‍්‍රගති සමාලෝචන රැස්වීම් සඳහා සහභාගීවන අතර එහි පසුවිපරම් කටයුතු ජනාධිපති කාර්යාලය හරහා සිදුවන බව ද ජනාධිපති මෛත‍්‍රීපාල සිරිසේන මහතා මෙහිදී සඳහන් කළේය.

වංචාවක්, දූෂණයක්, අක‍්‍රමිකතාවක් කොතනකදී හෝ සිදු නොවිය යුතු අතර විනිවිදභාවයෙන් සහ පිරිසුදුව සිය කටයුතු කරගෙන යාමට සියලූ කාර්ය මණ්ඩල කැපවිය යුතු බව ජනාධිපතිවරයා කියා සිටියේය.

පසුගිය කාලය තුළ මුහුණදීමට සිදු වූ ස්වාභාවික ආපදා තත්ත්වයන් හමුවේ ගෙන ගිය සහන වැඩපිළිවෙළ රාජ්‍ය නිලධාරීන්ගේ කැපවීම, දක්ෂතාව සහ මානුෂීය ගුණාංග මැනවින් පිළිබිඹු කළ අවස්ථාවක් ලෙස හඳුන්වාදිය හැකි බව සඳහන් කළ ජනාධිපතිවරයා එහිදී සමස්ත රාජ්‍ය සේවයම සිදුකළ කැපවීම වෙනුවෙන් සිය කෘතඥතාවය ද පිරිනැමීය.

ජනාධිපති ලේකම් ඔස්ටින් ප‍්‍රනාන්දු මහතා ඇතුළු ජනාධිපති කාර්යාලයේ ජ්‍යෙෂ්ඨ නිලධාරීහු සහ සියලූම කාර්ය මණ්ඩල නිලධාරීහු මෙම හමුවට එක්ව සිටියහ.