(දිලීප් ජයසේකර)

රාජපක්ෂවරුන්ගේ පමණක් නඩු ඇසීමට වෙනම අධිකරණයක් පිහිටුවීමට හැකියාවක් නැතැයි ධීවර හා ජලජ සම්පත් අමාත්‍ය මහින්ද අමරවිර මහතා පවසයි.

“මම දන්නේ නෑ එහෙම පුළුවන් කමක් තියෙනවද කියලා.අනික තමයි අපිට ඕවා ගැන හොය හොයා යන්න වෙලාවක් නෑ.අපිට ඕනේ වැඩ කරන්න මිසක් නඩු ගැන කතා කර කර ඉන්න නෙමෙයි.ඒකෙන් කියවෙන්නේ නෑ හොරකම් කරන අයට අපි කැමතියි කියලා.අපි කියන්නේ ඒ ආණ්ඩුවේ වේවා මේ ආණ්ඩුවේ වේවා වැරදි කරන හොරකම් කරන කෙනෙක් ඉන්නවා නම් ඒ අයට එරෙහිව නිතිය ක්‍රියාත්මක විය යුතුයි.අපිට ඕනේ මේ රටේ පිරිසිදු දේශපාලනයක් ඇතිකරන්න.ඉදිරියේදි හෝ එවැනි තත්ත්වයක් ඇති කිරිමට අපි කැපවි කටයුතු කරනවා“

අධිකරණ අමාත්‍ය විජයදාස රාජපක්ෂ මහතා සම්බන්ධයෙන් තමන්ට කිසිදු ගැටලුවක් නැතැයි ඒ මහතා පවසයි.

“විජයදාස රාජපක්ෂ මහතා  පිළිබදව අපිට නම් කිසිදු ගැටලුවක් නෑ.එතුමාට විරුද්ධව හෝ එතුමාට එරෙහිව ගේන විශ්වාස භංග  වලට නම් සහාය දීමට අපේ බලාපොරොත්තුවක් නෑ.එතුමා තරග කලේ එජාපයෙන්.ඉතින් එතුමා පිළිබදව තීන්දු තීරණ ගන්නේ එජාපයේ අයයි.ඒ නිසා විජේදාස රාජපක්ෂ මහත්තයට එරෙහිව ගේන විශ්වාස භංග වලට අපේ සහායක් නෑ“

අමාත්‍යවරයා මේ බව පැවසුවේ අද (20) සුරියවැව වැදිවැව පැවති ජනහමුවකදීය.
 
“ඒ වගේම කියන්න ඕනේ දැන් ඩිලාන් පෙරේරා මහත්තයයි මායි අතරේ විරසකයක් තියෙනවා වගේ මාධ්යට මගින් පෙන්නනවා.නමුත් කියන්න ඕනේ පෙරේදාත් අපි දෙන්නා එකට තමයි කෑම කෑවේ.පෙරේදා බදුල්ලෙදි පැවති ජන හමුවකදී එතුමා කළ පොඩි විහිළුවක් තමයි මේ දුර දිග යමින් තියෙන්නේ.ඒ නිසා මම කියනවා ඩිලාන් පෙරේරා මහත්තයා හා මා එක්ක කිසිදු ගැටුමක් නෑ කියලා “යැයි ඒ මහතා ප්‍රකාශ කරයි.