(නිමල කොඩිතුවක්කු)

වසර 12ක් රට පාලනය කිරීමට තිබියදී වසර 10කින් රට බංකොලොත් කර පාලන බලය අතහැරිය රාජපක්ෂවරුන් යළිත් බලය ඉල්ලා සිටීම ගැන ජනතාව පුදුම විය යුතු යැයි මහවැලි සංවර්ධන සහ පරිසර රාජ්‍ය අමාත්‍ය අජිත් මාන්නප්පෙරුම  මහතා පැවසීය.

රට ජනතාව සහ රණවිරුවන් වෙනුවෙන් කිඹුල් කදුළු හෙළන රාජපක්ෂවරුන් හමුදා මූලස්ථානය චීනයට පවරා දෙමින්  රටේ සම්පත් කුණු කොල්ලයට විදේශීකයන්ට පැවරූ බව ජනතාව සිහි තබා ගත යුතු බවත් රාජ්‍ය අමාත්‍යවරයා සඳහන් කළේය.

කොළඹ අරලියගහ මන්දිරයේ අද (4) පැවැති මාධ්‍ය හමුවකට එක්වෙමින් ඔහු මේ බව පැවැසීය.

එහිදී වැඩිදුරටත් අදහස් දැක්වූ මහවැලි සංවර්ධන සහ පරිසර රාජ්‍ය අමාත්‍ය අජිත් මාන්නප්පෙරුම  මහතා මෙසේ ද කීවේය.

 ‘‘2015 ජනාවාරි 8 ජනතාව අපට බලය දුන්නේ ඒකාධිපති පාලනය පලවා හරිමින් ප‍්‍රජාතන්ත‍්‍රවාදයක් ස්ථාපිත කරන්න කියලයි. එදා අධික ණය කන්දක් සහිත රටක් තමයි තිබුනේ.  හිටපු  ජනාධිපතිවරයාට ජනතා බලය අවුරුදු 12ක් දුන්නහම ණය ගෙවා ගන්න බැරුව අවුරුදු 10න්  දමලා ගෙදර ගියා.

රාජපක්ෂවරුන්  අද බලය ගන්න එල්ලූනාට එදා අවුරුදු දෙකක් තමන්ට රට පාලනය කරන්න තියෙද්දි  ණය උගුලට මුහුණ දෙන්න බැරුව පැනලා ගියා.

වැටුප් විෂමතාවයක් නිසා  පසුගිය දිනවල රාජ්‍ය සේවකයන් උද්ඝෝෂණය කළා. මේ වැටුප් විෂමතාවය  ආවේ 1997 ඉඳන්. එහෙනම්  2005 ඉඳන් 2015 වෙනකම් රාජපක්ෂවරුන්ට මේක නිවැරදි කරන්න තිබුණා. එදා රාජ්‍ය සේවකයන්  ජනතාව විරෝධතා ඉදිරිපත් කරන්න පවා බිය වුණා. අද දුම්රිය රියදුරන් විරෝධතා කරනවා. මේවා අද ඊයේ ඉඳන්  ආපු ප‍්‍රශ්න නෙමෙයි.

ඇයි රාජපක්ෂ පාලන සමයේදී මේ විරෝධතා පැවැත්වුණේ නැත්තේ. සුදු වෑන් සංස්කෘතිය, මර්දනය, ඝාතන නිසා ජනතා ප‍්‍රශ්න එළියට ආවේ නැහැ. ජනතාව අපිව විශ්වාස කරලා දැන් ඔවුන්ගේ ප‍්‍රශ්න බය නැතුව ඉදිරිපත් කරනවා. අනික් පැත්තෙන් අපි හදපු ලස්සන රට කැත කරමින් රාජපක්ෂවරුන් විරෝධතා සංවිධානය කරමින් සිටිනවා.

යුද්ධය ඉවර කරලා වසර 6ක් රට පාලනය කරපු රාජපක්ෂවරුන්ට ආබාධිත රණවිරු ප‍්‍රශ්නය එදා විසඳන්න තිබුණේ. ඇයි අද මේ කිඹුල් කදුළු හෙළන්නේ කියලා අපි අහනවා. එදා ඔවුන් රණවිරු ප‍්‍රශ්න විසඳනවා වෙනුවට රණවිරු මූලස්ථානයත් චීන සමාගමකට විකුණුවා.

ආබාධිත රණවිරුවන්ටත් 2015ට පෙර ඒ අයගේ ඉල්ලීම රාජපක්ෂ පාලනයෙන් ඉල්ලන්න තිබුණණේ. හැබැයි එදා ආබාධිත රණවිරුවන්ටවත් පාරේ බහින්න පැලූවන් කමතක් තිබුණේ නැහැ. ආබාධිත රණවිරුවන් එදා මෙහෙම විරෝධතා පැවැත්වුවා නම් උදේ වෙනකොට මළ කඳක් බවට පත් වෙන්න තිබුණා.

අද අපි රණවිරුවන්ගේ, රාජ්‍ය සේවකයන්ගේ ප‍්‍රශ්ණ විසඳලා තියෙනවා. විරරෝධතාවලින්  රාජපක්ෂවරුන් කාලකන්නි සතුටක් ලැබුවත් අපේ අණේඩුව ජනතා හඬට කන් දෙමින් ඔවුන්ට සාධාරණය ඉටු කරමින් තිබෙනවා.

අද අපේ ජනාධිපති, අගමැති, ඇමතිවරුන් කොමිෂන් සභා හමුවේ පෙනී සිටිනවා, සාක්ෂි දෙනවා. හිටපු  ජනාදිපති මහින්ද රාජපක්ෂට  අපරාධ පරීක්ෂණ දෙපාර්තමේන්තුවට එන්න කිව්වා කියලා ඒකාබද්ධ විපක්ෂයේ පිරිස් පාර්ලිමේන්තුවේ බුදියන් හිටියා. අද නීතිය, අධිකරණය අපි ශක්තිමත් කරලා තියෙනවා.