(මුදිතා දයානන්ද )

මහ මැතිවරණයේදී එකට තරග කරන්නේ නම්  ශ්‍රී ලංකා නිදහස් පක්ෂය සමඟ මැතිවරණයට ඉදිරිපත් වන  ‘ලකුණ‘ ගැන සාකච්ඡා කිරිමට සුදානම් බව පාර්ලිමේන්තු මන්ත‍්‍රී සුසිල් පේ‍්‍රමජයන්ත මහතා අද (11) පැවසීය.

ඔහු මේ බව පැවසුයේ විපක්ෂ නායක කාර්යාලයේදි පැවති මාධ්‍ය හමුවකදී අදහස් දක්වමිනි.

අපේක්ෂකයාට එකඟව තිබියදී ලකුණක් ගැන කතා කරමින් පක්ෂය කැඩී යාමට ඉඩ සලස්වා  දයාසිරි ජයසේකර මහතා උත්සාහ කරන්නේ ශ්‍රී ලංකා නිදහස් පක්ෂය එක්සත් ජාතික පක්ෂයට හේත්තු කිරිමට දැයි ප‍්‍රශ්නයක් මතුවන බවද ඔහු පැවසීය. 

ශ්‍රී ලංකා නිදහස් පක්ෂය ශ්‍රී ලංකා පොදුජන පෙරමුණ ඉදිරිපත් කළ අපේක්ෂකයාටත් ඔහුගේ ප‍්‍රතිපත්තිවලටත් එකඟ නම් මේ මැතිවරණයේදි වැදගත් නොවන ලකුණ ගැන විවාදයක් ඇති කරගැනීම තේරුමක් නැති ක‍්‍රියාවක් බවද පේ‍්‍රමජයන්ත මහතා පැවසීය. 

පොහොට්ටුව යනු මේ වන විට පවතින ජනප‍්‍රියම ලකුණ බවද ඒ නිසා එය වෙනස් කිරිමේ අවශ්‍යතාවයක් තමන් නොදකින බවද ඔහු පැවසීය. මෙලෙස ලකුණක් ගැන කතා කරමින් දිගින් දිගට සාකච්ඡා ඇදගෙන යාමෙන් දැනට මන්ත‍්‍රීවරු 14කට අඩුවී තිබෙන ශ්‍රී ලංකා නිදහස් පක්ෂය එයිනුත් අඩක් වන තත්ත්වයට පත්වීම යැයිද පේ‍්‍රමජයන්ත මහතා වැඩිදුරටත් පැවසීය.